سرینگر/16نومبر :
سجاد غنی لون نے آج پارٹی کے الیکٹورل جنرل کونسل کی موجودگی میں صدر جموں و کشمیر پیپلز کانفرنس کے عہدے کا حلف اٹھایا ۔۔۔ پارٹی کی الیکشن اتھارٹی کے چیئرمین سید بشارت بخاری نے اس پُر وقار تقریب پر ان سے حلف لیا۔ تقریب حلف برداری میں پارٹی کی اعلیٰ قیادت سمیت جنرل کونسل کے ہزاروں مندوبین نے شرکت کی۔
حلف لینے کے بعد لون نے اپنے خطاب میں کہا کہ سیاسی طور پر موجودہ دور نہایت ہی پُر آشوب ہے اور جموں و کشمیر کی سیاسی قیادت کو منفرد چیلنجوں کا سامنا کرنا پڑتا ہے ۔ انہوں نے کہا کہ مختلف ادوار میں قیادت کی مختلف تعریفیں ہیں اور موجودہ دور میں قیادت کا مطلب لوگوں خصوصاً نوجوانوں کے لئے سینہ سپر ہوجانا ہے اور قیادت کا تقاضا ہے کہ وہ عوام کے سامنے حقیقت اور سچ بیان کرے ۔
لون نے کہا کہ سیاست میں سب سے آسان کام جھوٹ کا سہارا لینا ہے اور سب سے مشکل کام مصیبت کے وقت سچ بولنا ہے لیکن ہم پیپلز کانفرنس میں اس بات کو یقینی بنانے کی مثبت کوشش کریں گے کہ ہم سچ کا سہارا لے کر ایمانداری ، حوصلے اور یقین محکم کے ساتھ قیادت کریں گے ۔انہوں نے مزید کہا کہ وقت آیا ہے کہ قیادت غیر متزلزل ہو کر دوبارہ ایک جرات کے ساتھ سچ کے لئے سامنے آئے اور عوام کی رہنمائی کریں اور عوام کو بھی سچ کی پیروی کرنے دیں۔ موجود دور میں قیادت کو جموں و کشمیر کے لوگوں بالخصوص نوجوانوں کے مفادات کا تحفظ سب سے بڑا چیلنج ہے اور یہ کہ پیپلز کانفرنس ایک عام کشمیری کو نشانہ بننے سے بچانے کے لئے پوری طاقت کے ساتھ کوشش کرے گی۔
لون نے مزید زور دے کر کہا کہ پیپلز کانفرنس وہ جماعت ہے جس نے جانوں کا نذرانہ پیش کیا ہے اور پارٹی لوگوں کی زندگی کو باوقار طریقے سے گزارنے کے تعلق سے ہمیشہ کوشاں رہے گی۔ لون نے مزید کہا کہ ہم سیاسی سرگرمیوں کو فروغ دینے کی ہر ممکن کوشش کریں گے اور جموں و کشمیر کے عوام کے اس شاندار سیاسی وراثت کی بحالی کے لئے انتھک کوشش کریں گے جس کی ہم نے پرورش کی ہے ۔ اور ہم اس بات کو یقینی بنانے کے لئے تگ و دو کریں گے کہ اس شاندار وراثت کی بحالی ممکن ہو ۔اس موقع پر پارٹی کی اعلیٰ قیادت بھی موجود تھی جن میں عبدالغنی وکیل، عمران رضا انصاری، نظام الدین بٹ، سید منصور حسین، میر محمد فیاض، نذیر لاوے، ایڈووکیٹ بشیر احمد ڈار، عابد حسین انصاری، خورشید عالم، راجہ اعجاز علی ، محمد عباس وانی، یاسر ریشی، محمد اشرف میر، ہلال راتھر، عرفان انصاری، عرفان پنڈتپوری، حاجی فاروق احمد، نجیب نقوی، بشیر احمد چالکو، کنیز فاطمہ، عدنان اشرف میر، میر حفیظ اللہ، رشید محمود، عرفان مٹو، راشد لون ، مشتاق احمد لون، ایڈوکیٹ سلیم پرے، ریدھم سنگھ شامل ہیں ۔
