سری نگر،5 اپریل:
سری نگر پولیس نے 15مارچ 2023کو نوجوان کے قتل کا معمہ حل کرکے میاں بیوی سمیت تین ملزمان کو دھر دبوچ کر سلاخوں کے پیچھے دھکیل دیا۔ پولیس نے ملزمان کی شناخت ساہل مقبول نجار اور اس کی اہلیہ مہک ساہل اور وسیم احمد شیخ ساکنان نارکرہ بڈگام کے بطور کی ہے۔
پولیس کے ایک ترجمان نے بتایا کہ 15مارچ 2023کو سری نگر کے ٹنگن نوگام علا قے میں ایک نوجوان کی لاش پراسرار حالت میں برآمد کی گئی جس کی بعد میں شناخت سہیل رحمان بیگ ولد عبدالرحمن بیگ ساکن قرفلی محلہ سری نگر کے بطور ہوئی ۔
انہوں نے کہاکہ پولیس نے قانونی اور طبی لوازمات پورے کرنے کے بعد لاش وارثین کے حوالے کی اور اس ضمن میں ایف آئی آر زیر نمبر 48زیر دفعہ 302آئی پی سی کے تحت نوگام پولیس اسٹیشن میں کیس درج کرکے مزید تحقیقات شروع کی ۔
موصوف ترجمان کے مطابق ایس ایچ او نوگام کی سربراہی میں پولیس نے تحقیقات شروع کی جس دوران ثبوت و شواہد کو اکھٹا کرکے مشتبہ افراد کو حراست میں لیا گیا۔انہوں نے بتایا کہ محمد وسیم شیخ کو پالپورہ سونہ وار میں کرایہ کی رہائش گاہ سے ٹنگن نوگام تک سومو گاڑی میں لاش کو ٹھکانے لگانے میں دیگر دو ملزمان کی مدد کرنے پر گرفتار کیا گیا ہے۔
ان کے مطابق لاش کو ٹھکانے لگانے کی خاطر جس سومو گاڑی کا استعمال کیا گیا اس کو بھی برآمد کیا گیا ہے۔
پولیس نے کلیدی ملزمان کی شناخت ساہل مقبول نجار اور اس کی اہلیہ مہک ساہل ساکن نارکرہ بڈگام کے بطور کی ہے۔انہوں نے کہاکہ مذکورہ ملزمان منشیات فروشی کے دھندے میں بھی ملوث پائے گئے ہیں۔انہوں نے بتایا کہ اس سلسلے میں مزید تحقیقات جاری ہے۔
