سری نگر/ایڈیشنل ڈائریکٹر جنرل آف پولیس کشمیر رینج وجے کمار نےشوپیاں اور پلوامہ اضلاع کا دورہ کیا اور وہاں پرسیکورٹی منظر نامے کا جائزہ لیا ۔
آفیسران کے ساتھ میٹنگ کے دوران اے ڈی جی پی نے جنوبی کشمیر میں سرگرم ملی ٹینٹوں کے خلاف آپریشنز میں تیزی لانے کے احکامات جاری کئے۔
پولیس کے ایک ترجمان نے بتایا کہ اے ڈی جی پی وجے کمار نے بدھ کے روز شوپیاں اور پلوامہ اضلاع کا دورہ کیا اور وہاں پر ڈی آئی جی ، ایس ایس پی پیز اور دیگر سیکورٹی ایجنسیوں سے وابستہ آفیسران کے ساتھ میٹنگ کی ۔
انہوں نے کہاکہ میٹنگ کے دوران اے ڈی جی پی کو جنوبی کشمیر کی سیکورٹی صورتحال کے بارے میں جانکاری فراہم کی گئی ۔
معلوم ہوا ہے کہ اے ڈی جی پی نے میٹنگ کے دوران آفیسران کو ہدایت دی کہ وہ خصوصی ٹیمیں تشکیل دے کر سرگرم ملی ٹینٹوں کے خلاف بڑے پیمانے پر آپریشنز شروع کریں۔
اس موقع پر اے ڈی جی پی نے آفیسران کو ہدایت دی کہ جنوبی کشمیر میں جتنے بھی سرگرم ملی ٹینٹ ہیں انہیں کیفر کردار تک پہنچانے کی خاطر ملی ٹینٹ مخالف آپریشنز کو مزید وسع کریں تاکہ ملک دشمن عناصر کے منصوبوں کو پوری طرح سے ناکام بنایا جاسکے۔
