سری نگر،14جولائی :
ڈیموکریٹک پروگریسو آزاد پارٹی (ڈی پی اے پی) کے چیئرمین غلام نبی آزاد نے شوپیاں ضلع میں غیر مقامی مزدوروں پر دہشت گردانہ حملے کی مذمت کی۔
ایک بیان میں آزاد نے کہا”امن کے دشمن تارکین وطن مزدوروں پر اس طرح کے حملے کرکے اپنے مذموم عزائم سے جموں و کشمیر میں امن اور خوشحالی کو نقصان پہنچانے کی ہر ممکن کوشش کر رہے ہیں، میں زخمیوں کی جلد صحت یابی کے لیے دعا گو ہوں“۔
جموں و کشمیر میں کام کرنے والے مزدوروں کے خاندانوں کے ساتھ ہمدردی کا اظہار کرتے ہوئے آزاد نے لوگوں پر زور دیا کہ وہ اپنی حفاظت کو یقینی بنائیں کیونکہ یہ مزدور معاشرے کے غریب طبقے سے تعلق رکھتے ہیں جو گھرسے دور اپنے کنبوں کے لیے روزی کمانے کے لیے سخت محنت کرتے ہیں۔
آزاد نے کہا ”یہ غریب غیر مقامی مزدور جموں کشمیر کی معیشت میں ریڑھ کی ہڈی کی حیثیت رکھتے ہیں جو یومیہ اجرت پر اپنی روزی روٹی برقرار رکھنے کے لئے زندگی کے ہر شعبے میں محنت کرتے ہیں اور انہیں نشانہ بنانا انسانیت اور تمام مذاہب کے اصولوں کے خلاف ہے“۔
آزاد نے انتظامیہ سے کہا کہ وہ کشمیر میں تمام غیر مقامی مزدوروں کی حفاظت کو یقینی بنائے اور زخمیوں کو ایس ایم ایچ ایس ہسپتال سرینگرمیں ہر طرح کی مدد فراہم کرے۔
