جموں /10 ؍دسمبر:لیفٹیننٹ گورنر منوج سِنہا نے آج گورنمنٹ ایم اے ایم کالج میں ریاستی سطح کے یووا اُتسوکی اِختتامی تقریب میں شرکت کی۔
اِس دو روزہ پروگرام کااِنعقاد وزارتِ امور نوجوان و کھیل کود نے نہرو یووا کیندر سنگھٹن سے کیا تھا۔
لیفٹیننٹ گورنر نے اَپنے خطاب میں مصوری، شاعری، تقریر، فوٹوگرافی اور ثقافت سمیت مختلف زُمروں کے تحت جیتنے والوں کومُبارک باد دی اور نیک خواہشات کا اِظہار کیا۔
اُنہوں نے وزیر اعظم نریندر مودی کے پنچ پران سے متاثر ہو کر اس برس کے یووا اُتسو کے لئے پانچ نوجوانوں پر مبنی پروگراموں کو مربوط کرنے کی کوششوں کی ستائش کی۔
لیفٹیننٹ گورنر نے کہا کہ نوجوانوں کی طاقت ہمارے ملک کا سب سے بڑا اثاثہ ہے۔ وہ بغیر کسی خوف کے تمام مشکلات اور چیلنجوں کے خلاف اکیلے کھڑے ہونے کی ہمت رکھتے ہیں اور معاشرے کی بہتری کے لئے نئے خیالات اور نئے اَقدامات فراہم کرنے کے لئے ہمیشہ تیار رہتے ہیں۔
اُنہوں نے کہا کہ نوجوانوں کی تخلیقی صلاحیت اور محنت ہی وہ مضبوط قوت ہے جو ترقی کا نیا ایجنڈا ترتیب دے رہی ہے۔ اُنہوں نے مزید کہا کہ نئے خیالات اور یقین مختلف شعبوں کو متحرک کر رہے ہیں اور نئی دریافتوں اور اختراعات میں حصہ اَداکر رہے ہیں۔
لیفٹیننٹ گورنر نے تعمیری مقاصد کے حصول کے لئے نوجوانوں کی متحرک توانائی کو بروئے کار لانے کی ضرورت پر زور دیا۔
اُنہوں نے کہا کہ نوجوان بہتر مستقبل کی تشکیل اور سماجی و اِقتصادی اِنقلاب کا آغاز کرنے کے لئے سب سے طاقتور ذریعہ ہیں۔
لیفٹیننٹ گورنر نے نے کہا کہ اِقدام، قیادت، خود اعتمادی، استقامت، تخیل اور ناکامی سے سیکھنے کا حوصلہ نوجوانوں کی نایاب خصوصیات ہیں جو معاشرے کو متاثر کرتی ہیں اور ترقی کے سفر میں نئے اِمکانات کے دروازے کھولتی ہیں۔
اُنہوں ننے یووا اُتسو میں نوجوانوں کو ’وِکست بھارت کے ویژن کو عملی جامہ پہنانے کے لئے خود کو وقف کرنے کی ترغیب دی۔
لیفٹیننٹ گورنر نے کہا کہ مستقبل ہندوستان اور ہمارے نوجوانوں کا ہے۔ اُنہوں نے کہا کہ مجھے یقین ہے کہ نوجوان ایک خوشحال معاشرے کی تعمیر کے لئے دنیا کی قیادت کریں گے۔
اِس موقعہ پر لیفٹیننٹ گورنر نے یووا اُتسو کے فاتحین اور جیوری ممبروں کو مُبارک باد پیش کی۔
ڈائریکٹرنہرو یووا کیندر سنگٹھن جموں و کشمیر اور لداخ نثار احمد نے جموںوکشمیر یوٹی یووا اُتسو کے سلسلے میں منعقد ہونے والے مقابلوں کے بارے میں ایک تفصیلی رپورٹ پیش کی۔
اِس موقعہ پر رُکن پارلیمنٹ راجیہ سبھا غلام علی کھٹانہ، آئی جی پی جموں آنند جین،ڈی آئی جی جموں سانبہ کٹھوعہ رینج شکتی پاٹھک، سینئر افسران، اہم شخصیات، نوجوان اور عوام کی بڑی تعداد موجود تھی۔
