سرینگر 30 دسمبر:
جموں وکشمیر نیشنل کانفرنس کے صدر و رکن پارلیمان ڈاکٹر فاروق عبداللہ نے دورئہ خطہ پیرپنچال کے دوسرے روز پونچھ میں پارٹی کارکنوں اور عہدیداروں کے ایک اجلاس کی صدارت کی اور سرحدی علاقوں سے تعلق رکھنے والے پنچ ، سرپنچوں اور عام لوگوں کیساتھ ملاقات کرنے کے علاوہ ایک کرکٹ ٹورنامنٹ کا افتتاح بھی افتتاح کیا۔ ورکروں کے اجلاس میں ضلع میں پارٹی پروگرام، تنظیمی سرگرمیوں کے علاوہ لوگوں کے مسائل و مشکلات کے بارے میں تبادلہ خیالات کیا گیا۔ انہوں نے پارٹی عہدیداروں اور کارکنوں پر زور دیا کہ وہ عوام کیساتھ قریبی رابطہ رکھیں اور ہر حال میں عام لوگوں کے شانہ بہ شان رہیں۔ انہو ںنے کہا کہ نیشنل کانفرنس کو اسی وجہ سے ہمیشہ لوگوں کا تعاون اور اشتراک ملا ہے کیونکہ اس جماعت نے ہمیشہ لوگوں کو ہی طاقت کا سرچشمہ مانا ہے اور ہر نازک دور میں لوگوں کیساتھ کھڑی رہی ہے۔
دریں اثناءڈاکٹر فاروق عبداللہ نے پونچھ سٹیڈیم میں غلام محمد جان کرکٹ ٹورنامنٹ کا افتتاح کیا۔ اس موقعے پر موجود کھلاڑیوں اور شائقین سے خطاب کرتے ہوئے انہو ں نے نوجوانوں پر زور دیا کہ وہ کھیل کود کی سرگرمیوں میں ہمیشہ مصروف رہیں اور ایک صحت مند زندگی گزارنے کیلئے ہر ایک قسم کی نشہ آور چیز وں سے دور رہیں۔ کھیل کود کی سرگرمیوں کیلئے زیادہ سے زیادہ ٹورنامنٹوں کے انعقاد کی ضرورت پر زور دیتے ہوئے صدرِ نیشنل کانفرنس نے کہاکہ اس وقت ہماری نئی نسل کو منشیات کی صورت میں ایک بہت بڑا خطرہ لاحق ہوگیا ہے اور کھیل کود کی سرگرمیاں نوجوانوںکو ایسی بدعات سے دور رکھنے میں مددگار ثابت ہوسکتی ہے۔ اس موقعے پر پارٹی صوبائی یوتھ صدر جموں و سابق ایم ایل اے پونچھ اعجاز جان اور سابق ایم ایل سی جہانگیز حسین میر کے علاوہ ٹورنامنٹ کے منتظمین بھی موجود تھے۔
اس سے قبل ذرائع ابلاغ کے نمائندوں کے سوالوں کے جواب دیتے ہوئے ڈاکٹر فاروق عبداللہ نے جموں و کشمیر کے ریاستی درجہ کی بحالی اور اسمبلی انتخابات کے انعقاد میں تاخیر پر سوال اٹھاتے ہوئے کہا کہ لوگ جلد از جلد ایک منتخب حکومت چاہتے ہیں۔انہوں نے لوگوں کو نئے سال کی مبارکباد پیش کی اور قبل از وقت انتخابات کی امید ظاہر کرتے ہوئے عوام کے لئے ایک اچھا سال آنے کی خواہش کی۔
ایک سوال کے جواب میں انہوں نے کہا کہ ”مجھے امید ہے کہ حکومت جموں و کشمیر کے لوگوں کی توقعات اور امنگوں کو سمجھے گی اور جلد از جلد انتخابات کا انعقاد کرے گی۔ آخری انتخابات 2014 میں ہوئے تھے اور لوگ اپنی انگلیوں پر سیاہی لگانے کے لئے ایک اور موقع کا شدت سے انتظار کر رہے ہیں۔ سپریم کورٹ نے خود الیکشن کمیشن اور مرکزی حکومت کو اگلے سال ستمبر تک انتخابات کرانے کی ہدایت دی ہے“۔مجھے امید ہے کہ لیفٹیننٹ گورنر منوج سنہا ذاتی طور پر اس پر غور کریں گے۔ مرکز کے زیر انتظام علاقہ ایک منتخب حکومت چاہتا ہے تاکہ لوگوں کے حقیقی خدشات کو سنا اور ان کا ازالہ کیا جا سکے۔
