نیوز ڈیسک
سرینگر /تازہ برفباری کے بعد سرحدوں پر دراندازی کی کسی بھی کوشش کو ناکام بنانے کیلئے الرٹ جاری کر دیا گیا ہے کی بات کرتے ہوئے بی ایس ایف کے انسپکٹر جنرل کشمیر فرنیٹر اشوک یادو نے کہا کہ بی ایس ایف اہلکاروں کو متحرک رہنے کی ہدایت دی گئی ہے ۔ سی این آئی کے مطابق ہمہامہ میں بی ایس ایف ہیڈکوارٹرس پر ایک تقریب کے دوران میڈیا سے بات کرتے ہوئے بی ایس ایف کے انسپکٹر جنرل کشمیر فرنٹیئر اشوک یادو نے کہا کہ سیکورٹی فورسز کشمیر میں لائن آف کنٹرول کے ساتھ ہائی الرٹ پر ہیں اور کسی بھی نازک صورتحال سے نمٹنے کیلئے فوج کو پہلے ہی تیار کر رکھا ہے۔آئی جی بی ایس ایف یادو نے کہا کہ دراندازی کی کوششوں کو مؤثر طریقے سے روکنے کیلئے کمزور علاقوں کو محفوظ بنانے میں بی ایس ایف اور فوج کی مربوط کوششیں ہیں۔ انہوں نے کہا کہ بنیادی مقصد ملک دشمن عناصر کی طرف سے دراندازی کی کسی بھی ممکنہ کوشش کو ناکام بنانا ہے۔
انہوں نے کہا ’’اس سال برف باری میں کمی آئی ہے اور فورسز پہلے سے ہی ہائی الرٹ پر تھیں کیونکہ انٹیلی جنس اطلاعات تھیں کہ دراندازی کے امکانات اس سال بھی جاری رہ سکتے ہیں۔ ‘‘ آئی جی بی ایس ایف نے کہا کہ بی ایس ایف نے فوج کے ساتھ مل کر علاقے پر غلبہ حاصل کر لیا ہے اور یہ کوششیں خطے میں برف باری کے بعد بھی جاری رہیں گی۔ چونکہ برف باری کے بعد ہمارے لیے مشکل ہو سکتی ہے لیکن ہماری فوجیں تیار ہیں تاکہ وہ علاقے پر غلبہ حاصل کر سکیں۔لانچ پیڈ پر ملی ٹنٹوں کی موجودگی کے بارے میں آئی جی بی ایس ایف نے کہا کہ سرحد پار سے لانچ پیڈ پر دہشت گردوں کی موجودگی میں کوئی کمی یا اضافہ نہیں ہوا ہے۔
انہوں نے کہا’’انٹیلی جنس معلومات کے مطابق، دہشت گرد ہمیشہ لائن آف کنٹرول کو عبور کرنے کے موقع کے انتظار میں رہتے ہیں لیکن ہم نے سرحدوں پر سیکورٹی گرڈ کو مضبوط کیا ہے۔ ان کے لیے کامیاب ہونا بہت مشکل ہو گا۔ ‘‘آئی جی بی ایس ایف نے کہا کہ اگرچہ درجہ حرارت، ہوا کی رفتار اور برف باری کی وجہ سے اونچی جگہوں پر برفانی تودے گرنے کے خوف سمیت مختلف چیلنجز ہیں۔ ہم نے پہلے ہی اپنے فوجیوں کو ان حالات کیلئے تیار کر رکھا ہے اور وہ ایسے حالات میں علاقے پر کیسے غلبہ حاصل کر سکتے ہیں۔ انہوں نے مزید کہا کہ ہم کسی بھی صورت حال کے لیے تیار ہیں۔
انہوں نے کہا کہ بی ایس ایف نہ صرف سرحدوں کی حفاظت بلکہ خطے کی ہمہ گیر ترقی میں اپنا حصہ ڈالنے کے لیے وقف ہے۔ اپنے بنیادی حفاظتی کردار کے علاوہ، انہوں نے کہا کہ بی ایس ایف کمیونٹی کی ترقی کے اقدامات میں سرگرم عمل ہے۔
