جموں،16فروری:
وزیر اعظم نریندر مودی کے دورے جموں کے پیش نظر صوبے بھر میں سیکورٹی کے غیر معمولی انتظامات کئے گئے ہیں۔معلوم ہوا ہے کہ جمعے کے روز لیفٹیننٹ گورنر منوج سنہا نے مولانا آزاد سٹیڈیم جموں کا دورہ کیا اوروہاں پر سیکورٹی انتظامات کا جائزہ لیابتادیں کہ وزیر اعظم مودی20فروری کو مولانا آزاد اسٹیڈیم جموں میں عوامی جلسے سے خطاب کریں گے۔
اطلاعات کے مطابق وزیر اعظم نریندر مودی 20فروری کو جموں وارد ہونگے جس کو دیکھتے ہوئے جموں میں سیکورٹی کے فقید المثال انتظامات کئے گئے ہیں۔
نامہ نگار نے بتایا کہ جمعے کے روز سیکورٹی فورسز نے جموں کے مولانا آزاداسٹیڈیم کو پوری طرح سے سیل کیا جبکہ آس پاس علاقوں کی بھی تلاشی لی گئی۔انہوں نے بتایا کہ جموں صوبے میں ناکوں کا جال بچھایا گیا ہے اور کسی کو بھی بغیر تلاشی کے آگے جانے کی اجازت نہیں دی جارہی ہیں۔انہوں نے مزید بتایا کہ جمعے کے روز جموں وکشمیر کے لیفٹیننٹ گورنر منوج سنہا نے مولانا آزاد اسٹیڈیم جموں کا دورہ کیا اور وہاں پر سیکورٹی انتظامات کا جائزہ لیا۔
ذرائع نے بتایا کہ ایل جی منوج سنہا کے ہمراہ پولیس اور انتظامیہ کے سینئر آفیسران موجود تھے ۔انہوں نے کہاکہ منوج سنہا کو پولیس اور انتظامیہ کے سینئر آفیسران نے بتایا کہ مولانا آزا داسٹیڈیم میں وزیر اعظم کے عوامی جلسے کے پیش نظر سیکورٹی کے سخت ترین انتظامات کئے گئے ہیں جبکہ آس پاس علاقوں کی اونچی عمارتوں پر شارپ شوٹرس بھی تعینات کئے گئے ہیں۔
ایک سینئر پولیس افسر نے بتایا کہ وزیر اعظم کے دورے کے پیش نظر جموں و کشمیر میں سکیورٹی کے سخت انتظامات کئے گئے ہیں۔انہوں نے بتایا: ‘شہر میں مختلف مقامات پر عارضی ناکے بٹھائے گئے ہیں۔ اس کے علاوہ سرحدی علاقوں میں نگرانی بڑھائی گئی ہے’۔انہوں نے بتایا کہ جنگی ساز و سامان سے لیس سیکورٹی اہلکار انتہائی چوکنا ہیں۔
موصوف نامہ نگار نے بتایا کہ ناکوں پر مسافر بردار گاڑیوں کی بھی تلاشی کی جاتی ہے اور ان میں سوار مسافروں کی بھی جامہ تلاشی اور ان کے شناختی کارڈ بھی چیک کئے جا رہے ہیں۔انہوں نے بتایا کہ کئی مقامات پر راہگیروں کو بھی روک کر ان کی تلاشی اور شناختی کارڈ چیک کئے جاتے ہیں۔
رپورٹس کے مطابق اپنے دورے کے دوران وزیر اعظم لیفٹیننٹ گورنر منوج سنہا فوج، پولیس اور پیرا ملٹری فورسز کے اعلیٰ افسروں کے ساتھ میٹنگیں کریں گے۔
