سری نگر/ موسم سرما کا مشہور مقام برف پوش گلمرگ میں ایک بار پھر 21؍ فروری سے شروع ہونے والے کھیلو اِنڈیا کے چوتھے ایڈیشن کا اِنعقاد ہوگا۔اِس ایونٹ میں تقریباً ایک ہزار کھلاڑی، آفیشلز اور معاون عملہ موسم سرما کے مختلف کھیلوں کے مقابلوں میں حصہ لیں گے جن میں سنو بورڈنگ، الپائن سکی، نورڈِک سکی اور سنو کوہ پیمائی شامل ہیں۔ بیس ریاستیں اور یوٹیز الپائن سکی، نورڈِک سکی اور سنو بورڈنگ میں حصہ لے رہے ہیں جبکہ دس ریاستیں سکی کوہ پیمائی کے مقابلوں میں حصہ لے رہی ہیں۔
؎ محکمہ یوتھ سروسز اینڈ سپورٹس اورجموںوکشمیرسپورٹس کونسل کی جانب سے محکمہ سیاحت، گلمرگ ڈیولپمنٹ اَتھارٹی اور دیگر شراکت داروں محکموں کے اشتراک سے منعقد ہونے والے اِس ایونٹ کا آغاز میسکوٹ کے اجرأ کے ساتھ ہوگا جب کہ کھیلو اِنڈیا سرمائی کھیلوں کے چوتھے ایڈیشن کا ترانہ اور اَپنی مرضی کے مطابق ملبوسات ملک کے دیگر حصوں میں منعقد ہونے والے کھیلو اِنڈیا گیمز کی طرح ہی ہوگا۔
جموں و کشمیرسپورٹس کونسل کی جانب سے کھیلو اِنڈیا سرمائی کھیلوں کے میسکوٹ کے طور پر سنو لیپرڈ کو منتخب کرنے کا مقصد مقامی لوگوں کے اونچے پہاڑی ترقیاتی مسائل، اس کے نازک ماحول کو حل کرنے کے ساتھ ساتھ اِس خوبصورت بِگ کیٹ کے قدرتی مسکن کی حفاظت اور مستقبل کے لئے اِس کی بقا ء کو یقینی بنانے کے لئے تحفظ کی کوششوں کی اہمیت کو اُجاگر کرنا ہے۔
دریں اثنا، منتظمین کی جانب سے کھلاڑیوں اور آفیشلز کے لئے رہائش، ٹرانسپورٹ وغیرہ جیسے تمام لاجسٹک اِنتظامات مکمل کئے گئے ہیںاور موقعہ پر ہی ان کو حتمی شکل دی جارہی ہے ۔
اِس سلسلے میں سیکرٹری یوتھ سروسز اینڈ سپورٹس سرمد حفیظ نے گزشتہ دنوں متعلقہ محکموںکے نمائندوں کے ساتھ متعدد میٹنگیں منعقد کیں جبکہ سیکرٹری جے اینڈ کے سپورٹس کونسل نزہت گل موقعہ پر اِنتظامات کو حتمی شکل دینے نگرانی کر رہی ہے ۔
کرکٹ لیجنڈ سچن ٹنڈولکر جو کشمیر کے دورے پر تھے ،نے جموں و کشمیر سپورٹس کونسل کو کھیلوں کے ایونٹ کے اِنعقاد کے لئے نیک خواہشات کا اِظہار کیا۔اُنہوں نے اَپنے پیغام میں شرکأ کھلاڑیوں کو مشورہ دیا کہ وہ کھیل سے لطف اندوز ہوں اور یہاں اَپنے قیام کو یادگار بنائیں۔
اِفتتاحی اور اِختتامی تقریبات میں مقامی فن کاروں کی طرف سے شاندار ثقافتی پرفارمنس پیش کی جائے گی جس میں خطے کی ثقافتی تاریخ کی عکاسی کی جائے گی۔ 20؍ فروری کو ایک خصوصی ثقافتی شام کااہتمام ہوگا جس میں مقامی لوگوں کے علاوہ حصہ لینے والے کھلاڑی اور آفیشلز اور آنے والے سیاح بھی شرکت کریں گے۔
یہ بات یہاں قابل ذکر ہے کہ جموں و کشمیر نے اَب تک کھیلو اِنڈیا کے تینوں ایڈیشنوں کی میزبانی کی ہے جس میں شرکأ کی تعداد میں کافی اضافہ ہوا ہے کیوں کہ ملک بھر سے کھلاڑی اب برف پوش گلمرگ میں کھیلوں کے مقابلوں میں حصہ لینے کے لئے رُخ کر رہے ہیں۔ اِس سالانہ تقریب نے مقامی ثقافت اورضیافتوں کو فروغ دینے کے علاوہ جموں و کشمیر میں سرمائی سیاحت کو ایک بڑا فروغ دیا ہے۔
