سری نگر،31مارچ:
منشیات فروشوں کے خلاف مہم کو جاری رکھتے ہوئے پولیس نے جنوبی ضلع کولگام میں بد نام زمامہ منشیات فروش کی لاکھوں روپیہ مالیت کی غیر منقولہ جائیداد کو قرق کردیا۔
مذکورہ منشیات فروش کی شناخت سبزار احمد راتھر ولد عبدالسلام راتھر ساکن مالی پورہ دیوسر کے طور پر کی گئی ہے۔
پولیس ترجمان نے اپنے ایک بیان میں تفصیلات فراہم کرتے ہوئے کہا کہ کولگام پولیس نے سبزار احمد راتھر ولد عبدالسلام راتھر ساکن مالی پورہ دیوسر نامی ایک بد نام زمانہ منشیات فروش کی غیر منقولہ جائیداد قریب 30لاکھ روپیہ مالیت کا دو منزلہ رہائشی مکان قرق کر دیا۔
انہوں نے کہا کہ یہ کارروائی این ڈی پی ایس ایکٹ 1985 کے متعلقہ دفعات کے تحت انجام دی گئی اور اس سلسلے میں پولیس اسٹیشن قاضی گنڈ میں ایف آئی آر زیر نمبر 2/2019اور پولیس اسٹیشن دیوسر میں ایف آئی آر زیر نمبر 7/2023کے تحت مقدمات درج ہیں۔
بیان میں کہا گیا کہ کولگام پولیس کی طرف سے تحقیقات کے دوران اس جائیداد کی شناخت غیر قانونی طور حاصل شدہ جائیداد کے طور پر ہوئی ہے۔
