سرینگر / / سرحدی حفاظتی فورس ( بی ایس ایف ) کے ڈائریکٹر جنرل نے سرحدی ضلع کپواڑہ میں کنٹرول لائن کے علاقوں کا دورہ کرکے وہاں سیکورٹی فورسز کے ساتھ صورتحال کا جائزہ لیا اور دیگر معاملات کو لیکر انہوں نے افسران کے ساتھ تبادلہ خیال کیا ۔ سی این آئی کے مطابق بی ایس ایف کے ڈائریکٹر جنرل دلجیت سنگھ چودھری نے کپواڑہ میں لائن آف کنٹرول کے علاقوں کا دورہ کرکے سیکورٹی صورتحال اور چیلنجوں کا جائزہ لیا۔بی ایس ایف ترجمان کے مطابق ڈائریکٹر جنرل دلجیت سنگھ چودھری نے خصوصی ڈائریکٹر جنرل اور دیگر بی ایس ایف افسران کے ہمراہ کپواڑہ کے لائن آف کنٹرول کے علاقوں کا دورہ کیا ۔
اپنے دورے کے دوران بی ایس ایف کے سربراہ نے سیکورٹی فورسز اہلکاروں کے ساتھ بات چیت کی اور انہیں ہر وقت اپنی بہترین کارکردگی کا مظاہرہ کرنے کی تلقین کی۔بی ایس ایف کے ڈی آئی جی کے ہمراہ فیلڈ مقامات کے اپنے دورے کے دوران چیلنجوں اور موجودہ سیکورٹی صورتحال کا جائزہ لیا۔بی ایس ایف ترجمان کے مطابق ڈائریکٹر جنرل نے فوج کے ساتھ قریبی تعاون میں کنٹرول لائن کے ساتھ انسداد دراندازی گرڈ کو مزید مضبوط بنانے پر زور دیا ہے۔
ترجمان نے بتایا کہ بی ایس ایف کے ڈی جی نے سیکورٹی صورتحال اور فورس کی آپریشنل تیاریوں کا جائزہ لیا ۔دلجیت سنگھ نے فوج کے ساتھ قریبی تعاون میں کنٹرول لائن پر دراندازی مخالف گرڈ کو مزید مضبوط بنانے پر زور دیا۔ایل او سی پر، بی ایس ایف فوج کے آپریشنل کنٹرول میں کام کرتا ہے۔
