سرینگر،06جولائی:
جموں و کشمیر کے ضلع کولگام کے ہڈی گام علاقے میں دیر رات سکیورٹی فورسز اور عسکریت پسندوں کے درمیان ہوا تصادم اختتام پذیر ہو گیا۔ ایس ایس پی کولگام ڈاکٹر سندیپ چکرورتی نے نمائندے کو بتایا کہ ‘تصادم کے دوران دو مقامی عسکریت پسندوں نے خودسُپردگی کی ہے۔ انہوں نے بتایا کہ ‘دونوں مقامی عسکریت پسندوں نے اپنے والدین اور پولیس کی اپیل پر خودسُپردگی کی۔
خودسُپردگی کرنے والے عسکریت پسندوں میں ایک کی شناخت ندیم عباس میر ساکنہ گوفبل کولگام اور کفیل احمد میر ساکنہ میر پورہ قیموہ کولگام کے طور پر ہوئی ہے۔ یہ دونوں ٹی آر ایف تنظیم سے وابستہ تھے۔ وہیں پولیس نے ان کے قبضے سے اسلحہ اور گولہ بارود بھی برآمد کیا ہے۔
تفصیلات کے مطابق سکیورٹی فورسز کو ہڈی گام علاقے میں عسکریت پسندوں کے چھپے ہونے کی اطلاع موصول ہوئی جس کے بعد رات کے دوران ہی یہاں ایک جھڑپ شروع ہوئی۔ کولگام پولیس، فوج، سی آر پی ایف اور آر آر کی مشترکہ ٹیم یہ آپریشن انجام دے رہی تھی۔ اس سے قبل ضلع کولگام کے ناو پورہ میر بازار علاقے میں سکیورٹی فورسز اور عسکریت پسندوں کے مابین تصادم میں دو مقامی عسکریت پسند ہلاک ہوئے تھے۔
