سرینگر،03اگست:
سرینگر کے الوچی باغ بنڈ علاقہ میں مشتبہ عسکریت پسندوں نے پولیس پارٹی پر حملہ کیا۔ اس حملہ میں کسی کے زخمی ہونے کی اطلاع نہیں ہے۔ فورسز نے پورے علاقہ کو محاصرے میں لے کر حملہ آوروں کی تلاش شروع کر دی ہے۔
ایک پولیس ترجمان نے اپنے ایک بیان میں کہا کہ سرینگر کے الوچی باغ بنڈ علاقہ میں بدھوار کی شام کو جنگجوؤں نے پولیس پارٹی پر گولیاں چلائیں جس کا وہاں موجود مستعد اہلکاروں نے جواب دیا۔ تاہم جنگجوؤں نے اندھیرے کا فائدہ اٹھاتے ہوئے جائے موقع سے فرار ہونے میں کامیابی حاصل کی۔ان کا مزید کہنا تھا کہ واقعے کے فوراً بعد سیکورٹی فورسز نے پورے علاقے کو محاصرے میں لے کر حملہ آوروں کی بڑے پیمانے پر تلاش شروع کی ہے ۔ پولیس ترجمان نے کہا کہ اس واقعے میں کسی جانی یا مالی نقصان کی کوئی اطلاع نہیں ہے ۔
