سری نگر:24، اکتوبر:
شہرخاص میں واقع ’نقشبند پبلک ہائی اسکول‘ کو سب ڈویژنل مجسٹریٹ (ایس ڈی ایم )ایسٹ سری نگرکی جانب سے سیل یاسربمہر کردیاگیاہے ،جسکے نتیجے میں اس اسکول میں زیرتعلیم درجنوں طلباءوطالبات کے تعلیمی مستقبل پر سوالیہ نشان لگ گیاہے ۔
اطلاعات کے مطابق سری نگرشہر کے ڈاؤن ٹاؤن علاقہ میں واقع نقشبند پبلک ہائی اسکول،شیخ محلہ ایس آرگنج کو کچھ دن قبل سب ڈویژنل مجسٹریٹ (ایس ڈی ایم )ایسٹ سری نگر نے کسی وجہ یاوجوہات کی بناءپرسربمہر یاسیل کردیا۔اس نجی اسکول میں زیرتعلیم درجنوں طلباءوطالبات اپنے اساتذہ کے ہمراہ پیر کوپریس کالونی میں نمودار ہوئے ۔اسکول وردی میں ملبوس کمسن اورنوعمر طلباءوطالبات نے ہاتھوںمیں پلے کارڈس اُٹھارکھے تھے ،جن پر حکام سے اپیل لکھی گئی تھی کہ ہمارے اسکول کوفوری طورپرکھولاجائے ۔ایک چھوٹے بچے نے ہاتھوںمیں پلے کارڈ اُٹھارکھاتھا،جس پر لکھاتھا’تعلیم ہمارے لئے آکسیجن ہے ،اورہم اس آکسیجن کیساتھ جیناچاہتے ہیں “۔
احتجاجی طلباءوطالبات اوراُن کے اساتذہ نے حکومت سے اپیل کی کہ وہ سب ڈویژنل مجسٹریٹ (ایس ڈی ایم )ایسٹ سری نگر سے پوچھیں کہ اسکول کوکس بناءپر سربمہر کیاگیاہے ۔انہوںنے انتظامیہ سے اس معاملے میں فوری مداخلت کرنے کی اپیل کی ۔اس موقعہ پر طالبات نے نامہ نگاروں کوبتایاکہ اسکول بندکرنے سے ہمارا تعلیمی مستقبل خطرے میں پڑگیاہے ۔انہوںنے کہاکہ اگرکوئی معاملہ ہے تواسکو ل کوبند کرکے بچوں کودربدر کرنا کہاںکاانصاف ہے ۔
طالبات نے حکام سے پُرزوراپیل کی کہ وہ اس معاملے میں فوری مداخلت کرکے سربمہر کئے گئے نقشبند پبلک ہائی اسکول،شیخ محلہ ایس آرگنج کوکھولنے کے احکامات صادر کریں تاکہ یہاں زیرتعلیم درجنوں طلباءوطالبات معمول کے مطابق اسکول جاکر تعلیم حاصل کرسکیں ۔