سرینگر:،04جون:
جموں و کشمیر انتظامیہ نے ہفتہ کو آندھرا پردیش کیڈر کے ستیش چندرا (ریٹائرڈ آئی اے ایس افسر) کو جموں و کشمیر پبلک سروس کمیشن کا چیئرمین مقرر کیا۔ایک نوٹیفکیشن میں لیفٹیننٹ گورنر منوج سنہا نے ستیش چندرا، آئی اے ایس (ریٹائرڈ) کو جموں اور کشمیر کے مرکزی علاقے کے لیے پبلک سروس کمیشن کے چیئرمین کے طور پر مقرر کرنے کا حکم دیا۔
نوٹیفکیشن کے مطابق، چندرا اُس وقت تک پبلک سروس کمیشن کے چیئرمین کے عہدے پر فائز رہیں گے جب تک وہ باسٹھ سال کی عمر کو نہ پہنچ جائیں اور اُن کی تقرری عہدہ سنبھالنے کی تاریخ سے نافذ ہوگی۔ اس کا مطلب ہے کہ وہ 19 نومبر 2023 تک اس عہدے پر فائز رہیں گے۔
چندرا 1986 بیچ کے آئی اے ایس افسر ہے جو نومبر 2021 میں ریٹائر ہوئے تھے۔ وہ چیف منسٹر چندرا بابو نائیڈو کے خصوصی چیف سکریٹری کے طور پر بھی خدمات انجام دے چکے ہیں اور سال 2008 سے 2013 تک کیمیکل اور فرٹیلائزر کی مرکزی وزارت میں جوائنٹ سکریٹری کے طور پر بھی خدمات انجام دیں۔
