جموں، 10جون :
امن و قانون کی صورتحال کو برقرار رکھنے کی خاطر انتظامیہ نے بھدرواہ قصبے میں جمعے کے روز سخت کرفیو نافذ کر دیا جبکہ رام بن، کشتواڑ اورڈوڈہ میں انٹرنیٹ خدما ت کو منقطع کیا گیا۔
ادھر پولیس کے ایک ترجمان کا کہنا ہے کہ سوشل میڈیا پر قابل اعتراض مواد اپ لوڈ کرنے والوں کے خلاف کیس درج کیا گیا ہے۔
یو این آئی اردو کے نامہ نگار نے بتایا کہ بھدرواہ قصبے میں جمعرات کی شام کو شر پسند عناصر نے سوشل میڈیا پر قابل اعتراض مواد پوسٹ کیا جس وجہ سے ضلع بھر میں کشیدگی کا ماحول پھیل گیا۔
انہوں نے کہا کہ قصبہ بھدرواہ میں امن و قانون کی صورتحال کو برقرار رکھنے کی خاطر ضلع مجسٹریٹ نےکرفیو نافذ کرنے کے احکامات صادر کئے ۔
موصوف نامہ نگار نے بتایا کہ جمعے کے روز بھدرواہ اور اس کے آس پاس علاقوں میں سخت کرفیو نافذ کیا گیا اور لوگوں کو گھروں میں ہی رہنے کی تلقین کی گئی۔
پولیس کے ایک ترجمان نے بتایا کہ قابل اعتراض مواد اپ لوڈ کرنے والوں کے خلاف بدرواہ پولیس تھانے میں ایف آئی آر درج کیا گیا ہے۔
انہوں نے بتایا کہ جو کوئی بھی قانون کو اپنے ہاتھ میں لے گا اُس کے خلاف سخت کارروائی عمل میں لائی جائے گی۔
موصوف ترجمان کے مطابق امن و قانون کی صورتحال کو برقرار رکھنے کی خاطر بھدرواہ قصبے میں احتیاطی طورپر جمعے کے روز کرفیو نافذ کیا گیا ہے۔
دریں اثنا افواہوں سے بچنے کی خاطر انتظامیہ نے کشتواڑ ، رام بن اور ڈوڈہ اضلاع میں موبائیل انٹرنیٹ خدمات کو بھی منقطع کیا ہے۔
ذرائع نے بتایا کہ شر پسند عناصر کے خلاف پہلے ہی ایف آئی آر درج کیا گیا اور اُن کی بڑے پیمانے پر تلاش شروع کی گئی ہے۔
وزیر اعظم دفتر میں تعینات وزیرمملکت ڈاکٹر جتندر سنگھ نے بتایا کہ ضلع ترقیاتی کمشنر ڈوڈہ اور ایس ایس پی بھدرواہ قصبے میں خیمہ زن ہیں اور وہ حالات کا از خود جائزہ لے رہے ہیں۔انہوں نے بتایا کہ ’ میں دونوں فرقوں سے وابستہ ذی عزت شہریوں سے اپیل کرتا ہوں کہ وہ آپسی بھائی چارے کو برقرار رکھنے کی خاطر آگے آئیں۔
انہوں نے لوگوں سے اپیل کی کہ وہ امن و قانون کی صورتحال کو برقرار رکھنے کی خاطر انتظامیہ کے ساتھ بھر پور تعاون فراہم کریں۔
موصوف مرکزی وزیر مملکت نے بتایا کہ ڈپٹی کمشنر ڈوڈہ وکاس شرما، صوبائی کمشنر جموں رامیش کمار ، ایس ایس پی ڈوڈہ کے ساتھ رابطے میں ہوں اور وہ از خود حالات کی نگرانی کر رہے ہیں۔(یو این آئی)
