جموں،13جون:
امر ناتھ یاترا 2022 کے پیش نظر سکیورٹی بندوبست کا جائزہ لینے کےلیے سیول انتظامیہ کےساتھ ساتھ دفاعی ایجنسیوں کے سنیئر افسران پر مشتمل ایک اعلیٰ سطح کی میٹنگ کا انعقاد عمل میں لایا گیا۔ دھرم کنڈ ملٹری اسٹیشن میں منعقدہ اجلاس میں ڈیلٹا فورس کے جنرل کمانڈنگ آفیسر ایڈیشنل ڈائریکٹر جنرل آف پولیس مکیش سنگھ، ڈی آئی جی رینج، ایس ایس پی رام بن کےساتھ ساتھ فوج اور پولیس و دیگر سکیورٹی ایجنسیز کے اعلیٰ افسران نے بھی شرکت کی۔
یاترا کی سیکورٹی صورتحال کا جائزہ لینے کے لئے دفاعی ایجنسیز کا خصوصی اجلاسدفاعی ذرائع نے بتایا کہ اجلاس کے دوران خطہ میں سکیورٹی صورتحال، یاتریوں کے تحفظ کےساتھ ساتھ امر ناتھ یاترا کے سلسلہ میں اضافی سکیورٹی فورسز کی تعیناتی و دیگر اقدامات پر تفصیلی روشنی ڈالی گئی۔
انہوں نے مزید کہا کہ امر ناتھ یاترا کے ساتھ ساتھ دفاعی ایجنسیوں کے اعلیٰ حکام نے خطہ کے دیگر مسائل پر بھی تفصیلی روشنی ڈالی جبکہ سِول انتظامیہ، پولیس اور فوج کےساتھ ساتھ دیگر سکیورٹی ایجنسیز کے درمیان آپسی اشتراک سے کام کرنے پر زور دیا گیا۔قابل ذکر ہے کہ رواں برس یاترا شروع ہونے سے قبل انتظامیہ نے کئی اقدامات اٹھائے ہیں جن میں پبلک مقامات کی جیو ٹیگنگ کے ساتھ ساتھ مقامی مزدوروں کو یاترا شروع ہونے سے قبل ہی اندراج کرانا لازمی قرار دیا گیا ہے۔
