شوپیاں،05جولائی:
اپنی پارٹی کے سربراہ سید محمد الطاف بخاری نے مرکزی سرکار سے کہا ہے کہ آنے والے اسمبلی انتخابات سے قبل جموں کشمیر کا ریاست کا درجہ بحال کیا جائے۔سید بخاری آج جنوبی ضلع شوپیاں کے کیلر بلاک میں عوامی جلسے سے خطاب کررہے تھے۔ جلسے میں مقامی لوگوں اور پارٹی کے حامیوں نے سید الطاف بخاری کا والہانہ استقبال کیا۔ اُن کے علاوہ جو سرکردہ لیڈران جلسے میں موجود تھے، اُن نے سینئر نائب صدر غلام حسن میر، پارٹی کی پولٹیکل افیئرس کمیٹٰی کے چیئر مین محمد دلاور میر، نائب صدر اور ضلع صدر شوپیاں ظفر اقبال منہاس، چیف کارڈی نیٹر عبدالمجید پڈر، چیئر پرسن ڈی ڈی سی شوپیاں بلقیس اختر، وائس چیئر مین ڈی ڈی سی اور جنرل سیکرٹری یوتھ ونگ عرفان منہاس، ضلع نائب صدر ایڈوکیٹ گوہر وانی، ضلع سیکرٹری تنویر ٹاک، بلاک صدر شوپیاں نذیر احمد، بلاک صدر کیگام عبدالرشید میر، ٹرائبل لیڈر شبیر دیداد، نوجوان لیڈر سُہیل راتھر، خواتین لیڈران نگینہ جی،اور یاسمین جی، سینئر لیڈر عبدالقیوم شاہ، اور سینئر لیڈر فضل الدین شامل تھے۔
موصولہ بیان کے مطابق سید الطاف بخاری نے مرکزی سرکار سے مطالبہ کیا کہ آنے والے اسمبلی انتخابات سے قبل ہی جموں کشمیر کا ریاست کا درجہ بحال کیا جائے۔ انہوں نے کہا، "چونکہ مرکزی سرکار وعدہ کرچکی ہے کہ وہ جموں کشمیر کا ریاست کا درجہ بحال کرائے گی، اچھا ہے کہ اگر وہ اپنا یہ وعدہ اسمبلی انتخابات کے انعقاد سے پہلے پورا کرے۔”
سید الطاف بخاری نے جیلوں میں نظر بند کشمیری نوجوانوں کو مین سٹریم کے دائرے میں آنے کا موقعہ فراہم کرنے کا مطالبہ بھی کیا ہے۔ انہوں نے کہا، ” یہاں کے بہت سارے نوجوان فی الوقت جیلوں میں قید ہیں۔ اپنی پارٹی چاہتی ہے کہ حکومت ان نوجوانوں کو مین سٹریم کے دائرے میں آنے اور ایک پر امن زندگی بسر کرنے کا ایک موقعہ فراہم کرے۔ اس ضمن میں حکومت ایک کمیٹی قائم کرسکتی ہے، جس میں ان نوجوانوں کے معاملات کا جائزہ لیا جاسکتا ہے۔”
انہوں نے شوپیاں کے عوام کے سیاسی استحصال، جو روایتی سیاسی جماعتیں کرتی آئی ہیں، کا تذکرہ کرتے ہوئے کہا، "شوپیاں جموں کشمیر کی چند ایسی جگہوں میں شامل ہے، جسے قدرت نے وسائل سے مالا مال کردیا ہے۔ روایتی سیاسی جماعتوں کو سالہا سال تک حکومت کرتی آئی ہیں نے ان وسائل کا استعمال، جس سے یہاں کے لوگوں کو خوشحالی میسر آسکتی تھی اور ترقی ہوسکتی تھی، کرنے کی کوئی کوشش نہیں کی۔ میں آپ کو یقین دلاتا ہوں کہ اگر اپنی پارٹی کی حکومت آگئی توہم اس ضلع کی تعمیر و ترقی کا ایک شاندار دور شروع کردیں گے۔”
انہوں نے اپنی پارٹی کی پالیسی کا تذکرہ کرتے ہوئے کہا، "ہماری پالیسی بالکل واضح ہے۔ ہم جموں کشمیر میں دائمی امن، مستقبل خوشحالی اور ترقی کے خواہاں ہیں۔ قدرت نے جموں کشمیر کو بے پناہ وسائل فراہم کئے ہیں۔ ان وسائل کو سائنسی طریقے سے استعمال کرنے کی ضرورت ہے۔ اپنی پارٹی ایسا ہی کرے گی کیونکہ ہماری ساری توجہ تعمیر و ترقی پر ہوگی۔”
