سرینگر،25جولائی:
کرگل وجے دیوس کے سلسلے میں بھارتیہ جنتا پارٹی نے آج سرینگر کے لالچوک میں ایک تقریب کا اہتمام کیا اور لالچوک سے دراس تک بائک ریلی کا انعقاد کیا۔اس تقریب میں بی جے پی کے کارکنان نے شرکت کی اور پرچم کشائی کی۔ تقریب کے اہتمام کے لئے سیکورٹی فورسز کا بڑا بندو بست تھا اور لاچوک کو سیکورٹی حصار میں رکھا گیا تھا۔
اطلاعات کے مطابق دکانین اور کاروباری مراکز متاثر رہے جبکہ ٹرافک کی آمدو رفت کو متبادل سڑکوں سے چلنے کی اجازت تھی۔ اس تقریب میں شرکت کرنے والے کارکنان اور بائکرز نے اپنے تاثرات کا اظہار کرتے ہوئے کہا کہ یہ تقریب کرگل جنگ میں ہلاک ہونے والے فوجیوں کی یاد میں منعقد کی گئی ہے۔
گزشتہ روز بی جے پی کے یوتھ نیشنل سیکرٹری وبھو کمار نے کہا کہ دفعہ 370 کی منسوخی کے بعد یہ بی جے پی کی سرینگر میں سب سے بڑی تقریب ہوگی۔
واضح رہے کہ سنہ 1999 میں پاکستان اور بھارت کے فوجیوں کے مابین کرگل کے دراس سیکٹر میں جنگ ہوئی تھی جس میں بھارتی فوج نے پاکستان کے فوجیوں کو واپس جانے پر مجبور کیا تھا۔اس جنگ میں ہلاک ہونے والے بھارتی فوجی اہلکاروں کو فوج کی جانب سے ہر برس 26 جولائی کو کرگل وجے دیوس منایا جارہا ہے۔ تاہم اس سال حکمران جماعت بی جے پی نے بھی اس دن کو ماننے کا سلسلہ شروع کیا۔
