سری نگر، 31 اگست :
شمالی کشمیر کے بومئی سوپور گاوں میں بدھ کی شام کو سیکورٹی فورسز اور جنگجووں کے مابین تصادم میں ایک عدم شناخت ملی ٹینٹ مارا گیا جبکہ کراس فائرنگ میں ایک عام شہری گولی لگنے سے زخمی ہوا ہے اوراُس کی حالت ہسپتال میں مستحکم بتائی جارہی ہے۔
پولیس کے ایک ترجمان نے بتایا کہ شمالی کشمیر کے بومئی سوپور علاقے میں ملی ٹینٹوں کے چھپے ہونے کی ایک خاص اطلاع موصول ہونے کے بعد پولیس اور سیکورٹی فورسز نے اس علاقے کو اپنے محاصرے میں لے کر اُنہیں ڈھونڈ نکالنے کے لئے تلاشی کارروائی کا آغاز کیاتو اسی دوران خود کو سلامتی عملے کے گھیرے میں پا کر ملی ٹینٹوں نے اندھا دھند گولیاں برسا کر فرار ہونے کی بھر پور سعی کی تاہم حفاظتی عملے کی کارگر حکمت عملی نے اُنہیں فرار ہونے کا کوئی موقع فراہم نہیں کیا اور اس طرح سے طرفین کے مابین جھڑپ شروع ہوئی۔
موصوف ترجمان کے مطابق تصادم کے دوران ایک عدم شناخت ملی ٹینٹ مارا گیا جس کی شناخت اور تنظیمی وابستگی کے بارے میں جانچ پڑتال شروع کی گئی ہے۔دریں اثنا تصادم کے دوران ایک مقامی شہری جس کی شناخت علی محمد گنائی ولد عبدالحد گنائی ساکن بومئی کے بطور ہوئی ہے گولی لگنے سے زخمی ہوا ہے۔
پولیس ذرائع نے بتایا کہ عام شہری کی ٹانگ میں گولی پیوست ہوئی ہے اور اُس کی حالت مستحکم ہے۔
دریں اثنا ذرائع کا کہنا ہے کہ سیکورٹی فورسز کو علاقے میں دو سے تین ملی ٹینٹوں کی موجودگی کی اطلاع موصول ہوئی ہے۔ ذرائع نے بتایا کہ سیکورٹی فورسزنے آس پاس علاقوں کو محاصرے میں لے کر فرار ہونے کے سبھی راستوں پر پہرے بٹھا دئے ہیں۔ آخری اطلاعات موصول ہونے تک علاقے میں گھمسان کی لڑائی جاری تھی۔ اس سلسلے میں مزید تفصیلات کا انتظار ہے۔
