راجوری:15ستمبر:
بدھ کے روز پونچھ ضلع کے ساوجیاں علاقے میں ہوئے ایک سڑک حادثے میں11افراد کے ازجان اوردیگر27کے زخمی ہونے کے ایک روزبعدجمعرات کی صبح نزدیکی ضلع راجوری میں اسی نوعیت کا2 سڑک حادثہ رونما ہوا،جسکے نتیجے میں تاحال5افراد کی موت واقعہ ہوئی ہے اوردیگر12افراد زخمی ہوگئے ہیں ۔معلوم ہواکہ جموں و کشمیر کے راجوری ضلع میں جمعرات کو ایک بس کے حادثے کا شکار ہونے سے5 افراد ہلاک اور تقریباً25 دیگر زخمی ہو گئے۔
منجاکوٹ راجوری کے تحصیلدار جاوید چودھری نے بتایا کہ راجوری ضلع کے بھمبر گلی کے قریب جمعرات کی صبح کئی مسافروں سے بھری بس گہری کھائی میں گرنے سے 4 افراد کی موت ہو گئی۔معلو م ہواکہ مسافروں سے بھری یہ بس زیرنمبرJK02CD-9156پونچھ سے جموں جا رہی تھی تو دوران سفر راستے میں بھمبر گلی کے قریب ڈیری ریلیوٹ کے مقام پریہ گاڑی ڈرائیور کے کنٹرول سے باہر ہوکر لڑھک کر ایک گہری کھائی میں گر گئی۔
پولیس ذرائع نے بتایاکہ اس سڑک حادثے کی اطلاع ملتے ہی مقامی لوگوں نے پولیس اور فوج کے ساتھ مل کر بڑے پیمانے پر ریسکیو اوربچاؤآپریشن شروع کیا۔انہوںنے کہاکہ گہری کھائی میں گرنے سے بس کوکافی نقصان پہنچاہے جبکہ اس میں سوار مسافروںکوادھر اُدھر خون میںلت پت پایاگیا۔ذرائع نے بتایاکہ بچاؤ کارروائی کے دوران 4افراد کوموقعہ پر ہی مردہ پایاگیا جبکہ باقی متعددمسافر زخمی حالت میں کراہ رہے تھے ۔
انہوںنے بتایاکہ خون میں لت پت سبھی بے جان اورزخمی افرادکوکھائی سے سڑک پر پہنچانے کے بعدجی ایم سی اسپتال راجوری منتقل کیاگیا۔ڈاکٹروںنے بتایاکہ یہاں پہنچانے پر 4افراد کومردہ پایاگیاجبکہ ایک شدیدزخمی اسپتال میں دم توڑ بیٹھا۔ادھر لیفٹنٹ گورنر نے راجوری سڑک حادثے پرسخت دکھ کااظہار کرتے ہوئے مہلوکین کے لواحقین کیساتھ ہمردی ظاہر کی اورزخمیوںکی جلدصحٹ یابی کیلئے دعاکی ۔ایل جی جموں و کشمیرکے دفترمیں لیفٹنٹ گورنر منوج سنہا کے حوالے سے ایک ٹویٹ میں کہاگیاکہ راجوری میں ایک المناک حادثے کی وجہ سے جانی نقصان پر غمزدہ ہوں، دکھ کی اس گھڑی میں میری ہمدردیاں سوگوار خاندانوں کے ساتھ ہیں۔ زخمیوں کو جلد از جلد صحت یاب کرے۔ ضلعی انتظامیہ ہر ممکن تعاون فراہم کر رہی ہے۔
دریں اثناء راجوری ضلع میں رونماہوئے ایک اور سڑک حادثے میں2 نوجوانوں سمیت7افراد زخمی ہوگئے ۔معلوم ہواکہ جمعرات کی صبح کوٹرنکا سے راجوری کی طرف جانے والی ایک گاڑی مندر گالا کے مقام پر سڑک سے الٹ گئی اور ایک کھیت میںگرگئی۔ذرائع نے بتایا کہ اس حادثے میں 7 افراد زخمی ہوئے، جن میں 2 نوعمر اور 4 خواتین شامل ہیں۔زخمیوں کی شناخت بشارت احمد، ان کی اہلیہ گڈی بیگم، ان کی بیٹی مہرین کوثر، سعیدہ تبسم، دلشاد احمد، گلناز اختر اور سلیمان رشید کے نام سے ہوئی ہے۔سبھی زخمیوںکوفوری طورپر نزدیکی اسپتال منتقل کیاگیا،جہاں اُن کاعلاج کیاجارہاہے ۔ پولیس نے بتایا کہ انہوں نے واقعے کا نوٹس لے لیا ہے۔
