جموں ،24 اکتوبر:
جموں و کشمیر کے ادھم پور ضلع میں سینٹرل ریزرو پولیس فورس (سی آر پی ایف) کے ایک کمانڈنٹ کو فورس کی ایک خاتون افسر کو جنسی طور پر ہراساں کرنے کے الزام میں گرفتار کیا گیا۔حکام نے بتایا کہ اتوار کو ایک شکایت درج کی گئی تھی جس میں بٹل بالیاں میں سی آر پی ایف یونٹ کے ایک اسسٹنٹ کمانڈنٹ نے الزام لگایا تھا کہ کمانڈنٹ سریندر سنگھ رانا اسے جنسی اور ذہنی طور پر ہراساں کر رہے ہیں۔
شکایت کی بنیاد پر، کمانڈنٹ کے خلاف تعزیرات ہند آئی پی سی کی دفعہ 354-اے جنسی طور پر ہراساں کرنے اور 354-ڈی،509 کے تحت ادھم پور پولیس اسٹیشن میں مقدمہ درج کیا گیا ۔ادھم پور کے سینئر سپرنٹنڈنٹ پولیس ونود کمار نے بتایا کہ ملزم سی آر پی ایف کمانڈنٹ کو پولیس نے گرفتار کیا اور بعد میں عدالت نے اسے ضمانت پر رہا کردیا۔ایس ایس پی نے مزید کہا کہ معاملے کی تفتیش کی جا رہی ہے۔
