سرینگر۔29؍ اکتوبر:
قومی اور عالمی سطح پر جموں کشمیر کے کھلاڑیوں کی شاندار کارکردگی کو دیکھتے ہوئے جموں کشمیر کی انتظامیہ جہاں مختلف اضلاع میں کھیل مقابلوں کا انعقاد کر رہی ہے تو وہیں اب ان مقابلوں میں روائتی کھیل بھی شامل کئے گئے ہیں ۔ مختلف کھیل مقابلوں میں روائتی دیسی کھیل شامل ہونےسے نہ صرف نوجوان کھلاڑی خوش ہیں بلکہ بڑے بھی دلچسپی کا مظاہرہ کر رہے ہیں۔ حال ہی میں ضلع انتظامیہ ڈوڈہ نے ضلع میں ایسے ہی روائتی کھیل مقابلے کا اہتمام کیا جس میں اسکولی طلبہ اور دیگر نوجوانوں نے بڑھ چڑھ کر حصہ لیا۔
ان کھیلوں میں سنتولیا‘ کنچے اور ‘لنگڑی ٹانگ نامی دیسی کھیل کو شامل کیا گیا تھا۔ مقابلے کا رسمی افتتاح ضلع ترقیاتی کمشنر، ڈوڈہ، وشیش پال مہاجن نے اسپورٹس اسٹیڈیم میں کیا ۔ یاد رہے کہ یہ کھیل مقابلہ یوتھ سروسز اور اسپورٹس ڈپارٹمنٹ ڈوڈہ کے زیر انتظام منعقد کیا گیا تھا جس میں ضلع انتظامیہ سمیت مختلف محکمہ جات خصوصاً محکمہ کھیل کود کے افسران اور بیس کے قریب مقامی اسکولوں سے آئے طلبہ و طالبات نے شرکت کی۔ اس دوران سبھی کھلاڑیوں نے ان مقابلوں میں شاندار کارکردگی کا مظاہرہ کیا۔
روائتی کھیلوں کے مقابلے میں حصہ لینے والے کھلاڑیوں نے نمائندے زبیرقریشی کے ساتھ بات کرتے ہوئے حکام کے اس اقدام کی کافی ستائش کی۔ ایک کھلاڑی نے کہا کہ دیسی کھیل مقابلوں کے انعقاد سے نہ صرف کھلاڑیوں کی صلاحیتوں کو بروئے کار لانے کا موقع فراہم ہوا ہے بلکہ اس کے ذریعہ ثقافتی یادیں بھی تازہ ہوئیں ہیں ۔انہوں نے مستقبل بھی اس طرح کے پروگرامز کے انعقاد کی امید ظاہر کی۔ تقریب کے دوران بات کرتے ہوئے ، ڈی سی ڈوڈہ نے کہا کہ جن ابھیان کے تحت دیسی کھیل مقابلوں سے طلبہ کی ذہنی تندرستی کے ساتھ ساتھ جسمانی کسرت بھی ہو گی اور اس سے انہیں اپنے ماضی کو قریب سے جاننے کا بھی موقع فراہم ہوگا۔ انہوں نے کہا کہ کھیل کود کی سرگرمیوں میں حصہ لینے سے نوجوان غلط راستے جیسے منشیات وغیرہ استعمال سے بھی دور رہیں گے۔(ایم این این)
