نئی دہلی، 15 نومبر :
دہلی کی پٹیالہ ہاؤس کورٹ نے بالی ووڈ اداکارہ جیکلین فرنانڈیز کو رین بیکسی کے سابق پروموٹر شیویندر سنگھ کی اہلیہ ادیتی سنگھ کو 200 کروڑ روپئے کا دھوکہ دینے کے الزام میں ضمانت دے دی ہے۔ خصوصی جج شیلیندر ملک نے جیکلین فرنانڈیز کو پچاس ہزار روپئے کے مچلکوں پر ضمانت کا حکم دیا۔
عدالت نے 10 نومبر کو فیصلہ محفوظ کر لیا تھا۔ ای ڈی نے جیکلین کی ضمانت کی درخواست کی مخالفت کی تھی۔ 31 اگست کو عدالت نے جیکلین فرنانڈیزکے خلاف دائر ضمنی چارج شیٹ کا نوٹس لیا۔ 17 اگست کو ای ڈی نے سپلیمنٹری چارج شیٹ داخل کی تھی۔ ای ڈی نے سپلیمنٹری چارج شیٹ میں جیکلین کو ملزم بنایا ہے۔ ای ڈی نے اپریل میں اس معاملے میں جیکلین کی 7 کروڑ روپئے کی جائیداد ضبط کر لی ہے۔ ای ڈی کی چارج شیٹ کے مطابق اس معاملے کے اہم ملزم سکیش چندر شیکھر نے 5 کروڑ 71 لاکھ روپئے سے زیادہ کے تحائف دئے تھے۔ سکیش اپنی ساتھی پنکی ایرانی کے ذریعے جیکلین کو تحائف پہنچاتا تھا۔ ان تحائف میں 52 لاکھ روپئے مالیت کا گھوڑا اور 9 لاکھ روپئے کی پارسی بلی بھی شامل ہے۔
ای ڈی کے مطابق، سکیش چندر شیکھر نے غیر قانونی رقم کا استعمال کیا جو اس نے جیکلین کے لیے تحائف خریدنے کے لئے شیویندر سنگھ کی بیوی ادیتی سنگھ سمیت دیگر اعلیٰ پروفائل لوگوں سے دھوکہ دہی سے جمع کی تھی۔ ای ڈی کے مطابق، سکیش نے اس پورے جرم کا خاکہ تیار کیا اور جرم کو انجام دیا۔ دہلی پولیس نے سکیش چندر شیکھر پر مکوکا لگایا ہے۔ سکیش اے آئی اے ڈی ایم کے انتخابی نشان کے معاملے میں الیکشن کمیشن کو رشوت دینے کی کوشش کرنے پر جیل میں ہے۔
