سری نگر ،16نومبر:
کشتواڑ ضلع کے راچل مروہ علاقے میں ایک گاڑی ڈرائیور کے قابو سے باہر ہو کر گہری کھائی میں جاگری جس کے نتیجے میں آٹھ افراد ہلاک ہوئے۔ ڈپٹی کمشنر کشتواڑ کے مطابق ابتدائی اطلاعات کے مطابق حادثے میں پانچ سے آٹھ افراد از جان ہوئے ہیں۔
بدھ کی شام کو کشتواڑ کے مرہ علاقے میں اُس وقت سنسنی کا ماحول پھیل گیا جب ایک سومو ڈرائیور کے قابو سے باہر ہو کر گہری کھائی میں جاگری جس کے نتیجے میں چار خواتین سمیت آٹھ مسافر ہلاک ہوئے۔ نمائندے نے بتایا کہ حادثے کی اطلاع موصول ہوتے ہی پولیس ، فوج اور مقامی لوگ جائے موقع پر پہنچے اور زخمیوں کو ہسپتال پہنچایا تاہم ڈاکٹروں نے سبھی کو مردہ قرار دیا۔ مہلوکین کی شناخت محمد امین شیخ ، ڈرائیو رعمر گنائی، محمد عرفان ساکن مرہ، آفاق احمد ہجام ، صفورہ بانو ، انجیر ، مزملہ بانو اور آسیہ بانو ساکنان یاردو مرہ کے بطو رہوئی ہے۔
ایس ایس پی کشتواڑ شفقت حسین نے حادثے کی تصدیق کرتے ہوئے بتایا کہ اس بھیانک حادثے میں آٹھ مسافر از جان ہوئے ہیں۔ انہوں نے بتایا کہ حادثے کی وجوہات جاننے کی خاطر کیس درج کرکے مزید تحقیقات شروع کی گئی۔ دریں اثنا ڈپٹی کمشنر کشتواڑ ڈاکٹر دیوناش یدو نے بتایا کہ کشتواڑ حادثے میں آٹھ افراد کے از جان ہونے کا خدشہ ہے۔ انہوں نے بتایا کہ حادثہ کیسے پیش آیا اس کی تحقیقات شروع کی گئی ہے۔
ادھر عوامی حلقوں نے اس بات پر شدید برہمی کا اظہار کیا ہے کہ کشتواڑ اور ڈوڈہ میں آئے روز ٹریفک حادثات پیش آرہے ہیں جس کے نتیجے میں انسانی جانیں ضائع ہو رہی ہیں تاہم انتظامیہ کی جانب سے ان حادثات پر قابو پانے کی خاطر کوئی حکمت عملی نہیں اپنائی جارہی ہیں۔ گزشتہ دنوں ہی ڈوڈہ حادثے میں پانچ افراد از جان ہوئے جبکہ اس سے قبل کشتواڑ میں ہی ہوئے حادثے میں نصف درجن کے قریب افراد اپنی قیمتی جانیں گنو ا بیٹھے۔ ادھر جموں وکشمیر کے لیفٹیننٹ گورنر منوج سنہا نے کشتواڑ میں پیش آئے حادثے پر گہرے رنج وغم کا اظہار کرتے ہوئے لواحقین کے ساتھ تعزیت کا اظہار کیا ہے۔( یو پی آئی)
