سری نگر،29 نومبر:
شمالی کشمیر کے قصبہ سوپور میں بظاہر گیس کے اخراج کے باعث دم گھٹنے سے ایک غیر مقامی فرد کی موت جبکہ اس کے دوسرے ساتھی کو ہسپتال میں داخل کرایا گیا ہے۔
ذرائع نے بتایا کہ فروٹ منڈی سوپور میں ایک ٹرک زیر نمبر PB0A6AU – 2925 میں دو دو غیر مقامی افراد کو منگل کی صبح بے ہوش پایا گیا۔
انہوں نے کہا کہ دو نوں کو اٹھا کر سب ضلع ہسپتال سوپور منتقل کیا گیا جہاں ڈاکٹروں نے ایک کو مردہ قرار دیا جبکہ دوسرے کو علاج کے لئے داخل کیا گیا۔ متوفی کی شناخت اشونی کمار کے بطور ہوئی ہے جبکہ اس کے دوسرے ساتھی کی شناخت راکیش کمار ولد امر ناتھ ساکنان گرداس پور پنجاب کے طور پر ہوئی ہے۔
دریں اثنا پولیس نے اس ضمن میں ایک کیس درج کرکے مزید تحقیقات شروع کی ہے۔ پولیس کا کہنا ہے کہ ابتدائی طور ایسا لگتا ہے کہ یہ گیس اخراج ہونے کا واقعہ ہے تاہم اس سلسلے میں تحقیقات جاری ہیں۔
