سری نگر،28فروری:
جموں وکشمیر کا3روزہ دورہ کرنے والی اعلیٰ سطحی ٹیم کی سربراہی مرکزی وزارت داخلہ میں تعینات جوائنٹ سیکرٹری برائے امورجموں وکشمیر اور لداخ پرشانت لوکھنڈے کررہی ہے ۔میڈیا رپورٹس مطابق اعلیٰ سطحی ٹیم 28فروری بروز منگل کوتین روزہ دورے پر جموں وکشمیر پہنچی اوریہ ٹیم 2مارچ کوواپس نئی دہلی پہنچنے کے بعداپنی جائزہ رپورٹ مرکزی وزیرداخلہ امت شاہ کوپیش کرے گی ۔
رپورٹ میں ذرائع کاحوالہ دیتے ہوئے بتایاگیاکہ مرکزی وزارت داخلہ کے حکام کی ٹیم راج بھون جموںمیں لیفٹیننٹ گورنر منوج سنہا سے ملاقات کرے گی اور ثانی الذکر سے جموں و کشمیر کی ترقی اور سلامتی سے متعلق مختلف امور پر تبادلہ خیال کرے گی۔
اس میٹنگ کے دوران سیکورٹی کی صورتحال اور خاص طور پر وزیر اعظم کے ترقیاتی پیکیج اور دیگر مرکزی معاونت والی اسکیموں کے تحت ترقیاتی کاموں کا تفصیلی جائزہ لینے کا امکان ہے۔ذرائع نے بتایاکہ مرکزی وزارت داخلہ میں تعینات جوائنٹ سیکرٹری برائے امورجموں وکشمیر اور لداخ پرشانت لوکھنڈے کی سربراہی میں یہ اعلیٰ سطحی ٹیم جموں وکشمیر کے چیف سکریٹری ڈاکٹر ارون کمار مہتا کے ساتھ جموں و کشمیر سے متعلق امور بشمول انتظامیہ کی جانب سے وزارت داخلہ کے سامنے وقتاً فوقتاً پیش کردہ تقاضوں پر علیحدہ میٹنگ کرے گی۔
یہ ٹیم مختلف محکموں کے انتظامی سیکرٹریوں کے ساتھ بھی میٹنگ کرے گی اور ترقی، سیاحت، صنعت اور کشمیری پنڈت تارکین وطن ،پاکستان اور پاکستانی زیر کنٹرول کشمیرکے مہاجرین ورفیوجیوں اوربے گھر ہوئے افراد کے مسائل پر تبادلہ خیال کرے گی۔ لیفٹنٹ گورنر،چیف سیکرٹری اور مختلف محکموں کے انتظامی سیکرٹریوں کے ساتھ تبادلہ خیال کے دوران یہ اعلیٰ سطحی ٹیم مرکزی معاونت والی مختلف اسکیموں پر پیشرفت اور وقت پر کاموں کی تکمیل کا بھی تفصیلی جائزہ لے گی۔
رپورٹ میں ذرائع کاحوالہ دیتے ہوئے بتایاگیاکہ تارکین وطن اور دیگر پناہ گزینوں کے مسائل کو جموں و کشمیر انتظامیہ کی طرف سے پہلے ہی ترجیحی بنیادوں پر اٹھایا جا رہا ہے۔رپورٹ میں اعلیٰ سطحی ٹیم کے شیڈول اور سرگرمیوں کے حوالے سے بتایاگیاہے کہ یکم مارچ کو مرکزی وزارت داخلہ کی دورہ کرنے والی یہ ٹیم سیکورٹی صورتحال کا جائزہ لے گی۔ میٹنگ میں دیگر حکام کے علاوہ ایڈیشنل چیف سکریٹری (ہوم) آر کے گوئل اور ڈائرکٹر جنرل آف پولیس دلباغ سنگھ بھی شامل ہوں گے۔
اس میٹنگ میں جموں و کشمیر خاص طور پرکشمیر وادی میں سیکورٹی کی صورتحال کا جائزہ لیا جا رہا ہے۔سیکورٹی حکام کے حوالے سے میڈیا رپورٹ میں بتایاگیاکہ کشمیر وادی میں ملی ٹنسیکے خلاف کارروائیاں زوروں پر ہیں اور متعدد ملی ٹنٹوں بشمول مختلف تنظیموں کے اعلیٰ کمانڈروں کو ختم یا گرفتار کیا گیا ہے۔
پولیس اور دیگر سیکورٹی ایجنسیاں وادی کے ساتھ ساتھ جموں خطہ میں اوور گراو ¿نڈ ورکرز (OGWs) نیٹ ورک کو بھی نشانہ بنا رہی ہیں۔غور طلب ہے کہ حال ہی میں، مرکزی وزارت داخلہ کی طرف سے نئی دہلی میں ایک اعلیٰ سطحی میٹنگ بھی ہوئی تھی جس میں جموں و کشمیر کے کچھ اضلاع سے مرحلہ وار فوج کی منتقلی اور اس کی جگہ سنٹرل ریزرو پولیس فورس کی تعیناتی کے اقدام پر تبادلہ خیال کیا گیا تھا۔ تاہم، جموں و کشمیر انتظامیہ کے ساتھ وزارت داخلہ کی ٹیم کی میٹنگ میں یہ مسئلہ زیر بحث آنے کا امکان نہیں ہے۔
رپورٹ کے مطابق جموں وکشمیر کاتین روز دورہ مکمل کرنے کے بعدوزارت داخلہ کی اعلیٰ سطحی ٹیم 2مارچ کونئی دہلی پہنچے گی اور اپنی تفصیلی جائزہ رپورٹ مرکزی وزیر داخلہ کو پیش کرے گی۔
