ڈوڈہ:،10مارچ:
جموں و کشمیر کے ڈوڈہ ضلع میں پولیس نے ایک سرکاری ملازم کو مبینہ طور پر سوشل میڈیا پر ‘نفرت انگیز’ تبصرہ پوسٹ کرنے کے الزام میں گرفتار کیا ہے۔ پولیس نے ایک بیان جاری کرکے اسکی اطلاع دی ہے۔ پولیس کے مطابق ملزم کی شناخت بیولی ڈوڈا کے رہائشی امرک سنگھ کے طور پر ہوئی ہے، جو چیف ایجوکیشن آفیسر ڈوڈا کے دفتر میں درجہ چہارم کے ملازم کے طور پر تعینات ہے۔ اس نے اپنے فیس بک اکاؤنٹ پر مبینہ طور پر نفرت انگیز پوسٹس اپ لوڈ کیے اور پولیس نے مذکورہ پوسٹ کے تناظر میں کہا کہ اس پوسٹ کے ذریعہ ضلع میں امن و امان کے خراب ہونے کا ہر اندیشہ تھا، اس لئے ملزم کو گرفتار کر لیا گیا ہے۔
انہوں نے کہا کہ معاملے کی حساسیت کو دیکھتے ہوئے اور صورتحال کو امن و قانون کے مسئلہ میں تبدیل ہونے سے روکنے کے لئے ڈوڈہ پولیس حرکت میں آئی اور پولیس اسٹیشن ڈوڈہ کی ایک پولیس پارٹی نے انسپکٹر ارون پرکاش شرما، ایس ایچ او پولیس اسٹیشن ڈوڈہ کی قیادت میں مذکورہ شخص کو گرفتار کر لیا اور ایک تفصیلی رپورٹ تیار کرنے کے بعد اسے ایگزیکٹیو مجسٹریٹ کلاس فسٹ ڈوڈا کے سامنے پیش کیا گیا جہاں سے اسے احتیاطی حراست میں ڈسٹرکٹ جیل بھدرواہ بھیج دیا گیا۔
ڈوڈہ پولیس کے بیان میں دعویٰ کیا گیا ہے کہ سوشل میڈیا کے زریعہ پُرامن ماحول کو خراب کرنے والوں کی سرگرمیوں پر کڑی نظر رکھی گئی ہے اور خبردار کیا گیا ہے کہ اگر کوئی کسی فرد یا برادری کے جذبات کو ٹھیس پہنچانے کے لیے نفرت پھیلانے میں ملوث پایا گیا تو اس طرح کی مصیبت پیدا کرنے والوں کے خلاف سخت کارروائی کی جائے گی۔
