سری نگر، 17 اپریل:
محکمہ موسمیات کی 20 اپریل تک بارشوں کی پیش گوئی کے بیچ وادی کشمیر میں وقفے وقفے سے بارشوں کا سلسلہ شروع ہوا۔
متعلقہ محکمے کے ایک ترجمان کے مطابق وادی میں اگلے چوبیس گھنٹوں کے دوران گرج چمک کے ساتھ کہیں کہیں بارشوں کا امکان ہے۔
انہوں نے کہا کہ 18 اور19 اپریل کو میدانی علاقوں میں ہلکی سے درمیانی درجے کی بارشیں جبکہ پہاڑی علاقوں میں برف باری متوقع ہے۔
ان کا کہنا تھا کہ اس دوران گرج چمک کے ساتھ بیس سے تیس کلو میٹر فی گھنٹہ کی رفتار سے تیز ہوائیں چل سکتی ہیں اور ژالہ باری ہونے کا بھی امکان ہے۔
موصوف ترجمان نے کہا کہ بعد ازاں وادی میں 19 سے 21 اپریل تک رک رک کر ہلکی سے درمیانی درجے کی بارشیں متوقع ہیں۔
انہوں نے کہا کہ 17 اور18 اپریل کو پہاڑی علاقوں میں کہیں کہیں زمینی ٹرانسپورٹ متاثر ہوسکتا ہے اور دن کا درجہ حرارت پانچ سے چھ ڈگری سینٹی گریڈ گر سکتا ہے۔
