پونچھ: جموں و کشمیر کے سرحدی ضلع پونچھ میں فوج نے لائن آف کنٹرول (ایل او سی) پر چیتن پوسٹ کے علاقے میں پاکستان سے ہتھیار اسمگلنگ اور نارکوٹکس کی کوششوں کو ناکام بنا دیا ہے۔ بھارتی فوج نے تین عسکریت پسندوں کو گرفتار کیا ہے جس میں ایک فاروق احمد زخمی حالت میں گرفتار ہوا ہے، اس کے ساتھ گرفتار ہونے والے دو عسکریت پسندوں کی شناخت محمد زبیر اور محمد ریاض کے طور پر ہوئی ہے۔ قبل ازیں پونچھ میں ایل او سی پر مشتبہ سرگرمی کی اطلاع ملنے پر فوج نے کارروائی شروع کردی۔ بدھ کی صبح ایل او سی کے قریب گلپور سیکٹر میں عسکریت پسندوں کی دراندازی کی اطلاع ملنے پر فوج نے فائرنگ کی۔
اس کے بعد فوج نے سرچ آپریشن شروع کر دیا ہے، تاکہ عسکریت پسندوں پر قابو پایا جا سکے۔ اس دوران فوج نے تین افراد کو گرفتار کرنے میں کامیابی حاصل کی ہے۔ تینوں نوجوان مقامی بتائے جارہے ہیں اور بتایا جارہا ہے کہ یہ تینوں نوجوان پاکستان سے ڈرون کے ذریعے بھیجے گئے ہتھیاروں کو لینے کی غرض سے سرحد کی طرف جارہے تھے ۔
