سری نگر: مرکزی وزیر ہردیپ سنگھ پوری اور لیفٹیننٹ گورنر منوج سنہا نے آج پولی تھین فری جموں مہم کے تحت ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او) کے تیار کردہ بائیو پلاسٹک کیری بیگز کو لانچ کیا۔ پیٹرولیم اور قدرتی گیس، ہاؤسنگ اور شہری امور کے مرکزی وزیر ہردیپ سنگھ پوری نے پولی تھین کا متبادل ملنے پر جموں کے لوگوں، میئر جے ایم سی اور یو ایل بی ممبران کو مبارکباد دی۔ انہوں نے لوگوں سے پولی تھین کو ترک کرنے اور ڈی آر ڈی او کے تیار کردہ پائیدار تھیلوں کو اپنانے پر زور دیا۔
اس موقعے پر مرکزی وزیر نے کہا کہ وزیر اعظم نریندر مودی نے شہر کاری کے چیلنجز کو مواقع میں بدل دیا ہے۔ وزیر اعظم کی رہنمائی میں صفائی مہم ملک کو بالخصوص شہری مراکز کو پائیدار ترقی اور ترقی کی راہ پر گامزن کر رہی ہے۔ آج صفائی حکومت کی ترجیح بن چکی ہے۔ انہوں نے کہا کہ یہ دیگر تمام سرکاری اسکیموں کے موثر نفاذ کا اصول بن گیا ہے۔
اس موقعے پر لیفٹیننٹ گورنر منوج سنہا نے پولی تھین بیگ کے متبادل کے طور پر بائیو پلاسٹک کیری بیگ تیار کرنے کے لیے ڈی آر ڈی او کی تعریف کی۔ انہوں نے کہا کہ یہ شہری منظر نامے کو تبدیل کرنے، تیز رفتار، پائیدار ترقی اور شہریوں کی زندگی میں آسانی پیدا کرنے کی جانب ایک اہم قدم ہے۔ پلاسٹک کی آلودگی سے نمٹنے کے لیے یہ بہترین آپشن ہے۔ لیفٹیننٹ گورنر نے معاشرے کے ہر طبقے سے تعلق رکھنے والے لوگوں، تمام اسٹیک ہولڈرز پر زور دیا کہ وہ فطرت کے تئیں اپنے فرائض ادا کریں اور پائیدار ترقی کے اہداف کو حاصل کرنے کے لیے خود کو دوبارہ وقف کریں۔ انہوں نے کہا کہ فطرت ہمیں متحد کرتی ہے اور موسمیاتی تبدیلی کے چیلنجز سے موثر انداز میں نمٹنے کے ساتھ ساتھ ایک ہم آہنگ اور خوشحال معاشرے کی تعمیر کے لیے لوگوں کی شرکت کلیدی حیثیت رکھتی ہے۔
لیفٹیننٹ گورنر نے کہا کہ لوگوں کو صاف ستھرے، سمارٹ اور گرین سٹیز اور آنے والی نسلوں کے بہتر مستقبل کے لیے ایسی کوششوں میں بڑھ چڑھ کر حصہ لینا چاہیے۔ انہوں نے کہا کہ موسمیاتی تبدیلیوں کا مقابلہ کرنے اور ایک پائیدار مستقبل کی تعمیر میں نوجوان اہم کردار ادا کریں گے۔ نوجوان ہمارے شہروں میں پلاسٹک کی آلودگی کو کم کرنے اور معاشی، تجارتی اور سماجی سرگرمیوں کو مضبوط کرنے کے لیے کمیونٹیز کی رہنمائی کریں گے۔
انہوں نے کہا کہ آج زمین اور سمندر دونوں کو سنگل یوز پلاسٹک سے خطرات لاحق ہیں۔ انہوں نے کہا کہ اس مہم پر عملدرآمد کے لیے عوام کی کوششوں مزید تیز کرنا ہوگا۔ انہوں نے مزید کہا کہ ہمیں پلاسٹک کی آلودگی کو کم کرنے کے لیے ٹیکنالوجی کی جدت اور کیلیبریٹڈ ایکشن دونوں کی ضرورت ہے،۔ہمارے پائیدار ترقیاتی پروگراموں کی کامیابی کو یقینی بنانے کے لیے پائیدار متبادل کو فعال کرنا ہے۔ لیفٹیننٹ گورنر نے پولی تھین فری جموں اور پلاسٹک کی آلودگی کے خلاف بیداری کے لیے کے لیے بنائی گئی دستاویزی فلموں، واکتھون اور دستاویزی فلموں کی تعریف کی۔ جموں و کشمیر میں پولی تھین اور سنگل یوز پلاسٹک پر مکمل پابندی عائد کر دی گئی ہے لیکن پلاسٹک کی آلودگی کو صرف حکومتی احکامات سے ختم نہیں کیا جا سکتا۔ جموں کو پولی تھین سے پاک بنانے کی مہم میں جموں شہر کے ہر شہری کی فعال شرکت کی ضرورت ہے۔ پولی تھین سے پاک جموں مہم کے دوران نمایاں تعاون کرنے پر تعلیمی اداروں، طلبہ، تنظیموں اور میڈیا والوں کو بھی اعزاز سے نوازا گیا۔
