بڈگام:وسطی کشمیر کے ضلع بڈگام میں ایک چونکا دینے والے واقعے منگل کی شام کو پیش آیا۔بڈگام کے مین مارکٹ میں منگل کی شام کو ایک 23 سالہ نوجوان کو نامعلوم افراد نے ‘تیز دھار ہتھیار’ سے وار کر کے شدید زخمی کر دیا ہے۔
ایک پولیس افسر نے اس ضمن میں بات کرتے ہوئے بتایا کہ ایک نوجوان جس کی شناخت 23 سالہ ثاقب علی بٹ ولد مشتاق احمد بھٹ ساکن زبر محلہ بڈگام کو مین ٹاؤن بڈگام میں ہی نامعلوم افراد نے چاقو سے وار کیا۔ انہوں نے کہا کہ اس حملے کے نتیجے میں مذکورہ شخص شدید طور پر زخمی ہو گیا ہے۔ واقعے کے فوراً بعد مذکورہ زخمی نوجوان کو خصوصی علاج کے لیے نزدیکی ضلع ہسپتال بڈگام لے جایا گیا۔ دوسری جانب پولیس نے اس واقعے کا سنجیدہ نوٹس لیتے ہوئے مزید تفتیش شروع کردی ہے۔
یہاں یہ بات قابل ذکر ہے کہ وادی کشمیر میں آئے دن ایسے واقعات رونما ہوتے ہیں جن میں کئی بار قیمتی جانوں کا ضیاع بھی ہوتا ہے۔ رواں برس ضلع بڈگام میں ایسے متعدد واقعات پیش آئے جو کہ باعث تشویش ہے۔
حالیہ ایام کے دوران وادی کشمیر کے مختلف اضلاع میں ایسے 10 سے زائد معاملات سامنے آئے ہیں، جہاں چاقو یا چھری سے حملے کیے گئے ہیں اور ان میں 2 افراد کی موت بھی واقع ہوئی ہے۔ کشمیر میں چھرا مارنے کے جرائم کی بڑھتی شرح انتہائی تشویشناک صورتحال اختیار کررہا ہے۔ ماہرین کہتے ہیں کہ وادی کشمیر میں پنپ رہے اس طرح کے نئے جرائم کے پیچھے کئی وجوہات کارفرما ہیں۔جن میں بے قابو غصہ، صبر کی کمی، منشیات، غربت، سماجی اخراج، سوشل میڈیا اور ذہنی امراض وغیرہ شامل ہیں۔
واضح رہے کہ سرینگر کے ڈی سی نے چھرا گھونپنے کے بڑھتے واقعات کے پیش نظر ضلع بھر میں عوامی مقامات پر تیز دھار ہتھیاروں کی خرید و فروخت پر پابندی عائد کی ہے۔
