سرینگر: ریاستی تحقیقاتی ایجنسی (ایس ائی اے) نے منگل کی شام جاری بیان میں دعویٰ کیا کہ "نارکو ٹیرر کیس، ایف آئی آر نمبر 19/2022 کی تحقیقات کے دوران، ریاستی تحقیقاتی ایجنسی کشمیر نے کامیابی کے ساتھ ایک نارکو ٹیرر ماڈیول کا انکشاف کیا اور اس کے کئی ارکان کو گرفتار کیا۔ ان میں سوپور کی روبینہ نذیر اور سینٹرل جیل کے قیدی اشفاق احمد میر قابل ذکر تھے۔ یہ افراد سرحد کے دوسری طرف واقع عسکریت پسندوں کے ہینڈلرز کے ساتھ مل کر نارکو ٹیرر ماڈیول چلا رہے تھے۔ اس ماڈیول کے چھ ارکان کو پہلے ہی گرفتار کیا جا چکا ہے، جب کہ کئی دیگر کی شناخت کر لی گئی ہے اور اُن کو پکڑنے کے کوششیں جاری ہیں۔”
ایجنسی نے مزید کہا کہ فرار ملزمان کا سراغ لگانے کے لیے جاری کارروائیوں کے ایک حصے کے طور پر مرکز کے زیر انتظام خطے میں متعدد مقامات پر چھاپے مارے گئے۔ ایس آئی اے نے مزید کہا کہ این آئی اے کی خصوصی عدالت نے نارکو ٹیرر ماڈیول کے مفرور افراد میں چھ لوگوں کو اشتہاری مجرم قرار دیا ہے۔ وہیں ایس آئی اے نے عدالت کو اب تک کی گئی تحقیقات سے آگاہ کیا۔’ ایس آئی اے نے ان ملزمین کی شناخت عبدالرشید بٹ ساکن اونتی پورہ (پلوامہ)، سوپور (بارہمولہ) کے رہنے والے عبدالرشید میر، کپواڑہ کے رہنے والے صغیر احمد پوسوال، کپواڑہ کے رہنے والے افتخار احمد شیخ، کپواڑہ کے رہنے والے بشارت احمد پوسوال اور راجوری کے رہنے والے جاوید احمد ٹھاکر کے طور پر کی ہے۔
بیان میں، ایجنسی کا دعویٰ ہے کہ وہ مفرور مجرموں کو پکڑنے کی کوشش میں کوئی کسر نہیں چھوڑ رہے ہیں۔ "ایس ائی اے کشمیر اس بات کو یقینی بنانے کے اپنے عزم پر قائم ہے کہ ان افراد کو جلد از جلد انصاف کے کٹہرے میں لایا جائے۔”
