سری نگر: ایک بڑی پیش رفت کے تحت ضلع سری نگر نے سوچھ وایو سرویکشن (کلین ائیر سروے) – 2023 کے تحت ملک کے اعلیٰ درجے کے شہروں میں اپنا مقام حاصل کیا ہے۔
اس پروگرام کے تحت سری نگر نے 10 لاکھ سے زیادہ آبادی والے شہروں کے زمرے میں آنے والے شہروں میں چوتھے درجے پر فائز ہو کر یہ سنگ میل حاصل کیا ہے۔
اندور پہلے درجے پر، آگرہ دوسرے، تھانے سٹی تیسرے درجے پر فائز ہیں جبکہ مدھیہ پردیشن کے بھوپال شہر نے پانچواں مقام حاصل کیا ہے۔
ایک سرکاری ترجمان نے بتایا کہ صاف فضائی سروے (کلین ائیر سروے) وزارت ماحولیات، جنگلات اور موسمیاتی تبدیلی (ایم ای ایف سی سی) کے مرکزی آلودگی کنٹرول بورڈ کے نیشنل کلین ائیر پروگرام (این سی اے پی) کے تحت انجام دیا جاتا ہے۔
انہوں نے کہا کہ این سی اے پی کے تحت ضلع انتظامیہ کی طرف سے ہوا کے معیار کو بہتر بنانے کے لئے ضلع انتظامیہ کی طرف سے شروع کئے گئے اقدام کی بنیاد پر سری نگر شہر کو یہ درجہ دینے کا فیصلہ لیا گیا۔
ضلع مسجٹریٹ سری نگر محمد اعجاز اسد جو این سی اے پی کی مانیٹرنگ کمیٹی کے ضلع چیئر مین بھی ہیں، نے اس اعزاز کے حصول پر سری نگر میونسپل کاپوریشن اور جموں وکشمیر پولوشن کنٹرول کمیٹی کے علاوہ ضلع انتظامیہ کی جملہ ٹیم کو مبارک باد پیش کی ہے۔
انہوں نے کہا کہ ضلع انتظامیہ سری نگر شہر کو رہنے کے لئے ایک بہترین جگہ بنانے کے لئے اپنی تمام تر کاوشیں جاری رکھے گی۔
قابل ذکر ہے کہ ضلع مجسٹریٹ سری نگر اعجاز اسد کی سربراہی میں ضلع انتظامیہ نے سری نگر میں فضائی معیار کے انڈیکس کو بہتر بنانے کے لئے 2025 تک پی ایم 10 کی سطح کو کم کرنے کے لئے این سی اے پی کو نافذ کرنے کے لئے کئی اقدام کئے ہیں۔
این سی اے پی کے تحت مشن لائف، بنجر زمینوں کی بحالی، وسیع پیمانے پر شجر کاری، چشموں کی تعمیر، صفائی کے لئے مشینوں کی خریداری اور آئی ای سی کی سرگرمیاں وغیرہ سری نگر میں ہوا کے معیار کے انڈیکس کو بہتر بنانے کے اہم اجزا ہیں۔
