اننت ناگ : جنوبی کشمیر کے اننت ضلع کے کوکرناگ علاقے میں سیکورٹی فورسز اور عسکریت پسندوں کے مابین انکاؤنٹر شروع ہو چکا ہے۔ پولیس نے انکاؤنٹر کی اطلاع سماجی رابطہ گاہ ایکس (سابق ٹویٹر) پر دی۔ جموں و کشمیر پولیس نے انکاؤنٹر کے دوران فوجی اہلکاروں سمیت پولیس اہلکاروں کے زخمی ہونے کی بھی اطلاع دی ہے تاہم اس ضمن میں مزید تفصیلات کا انتظار ہے۔
ا
سیکورٹی فورسز اور عسکریت پسندوں کے مابین گولیوں کا یہ تبادلہ کوکرناگ کے گڈول علاقے میں شروع ہوا۔ ابتدائی معلومات کے مطابق حفاظتی اہلکاروں، جن میں فوج، سی آر پی ایف اور جموں و کشمیر پولیس ٹیم شامل ہیں، نے گڈول علاقے کو اُس وقت محاصرے میں لے لیا جب انہیں علاقے میں عسکریت پسندوں کے چھپے ہونے کی اطلاع موصول ہوئی۔ ذرائع کے مطابق جوں ہی حفاظتی اہلکاروں نے علاقے کو گھیرے میں لے لیا، چھپے ہوئے عسکریت پسندوں نے حفاظتی اہلکاروں پر فائرنگ شروع کی جس کے جواب میں فورسز بھی مورچہ زن ہوئے۔
گولیوں کا یہ تبادلہ انکاؤنٹر کی شکل اختیار کر گیا اور گولیوں کے تبادلے میں، ابتدائی معلومات کے مطابق، دو فوجی اور ایک پولیس اہلکار کے بھی زخمی ہونے کی اطلاع ہے۔ زخمیوں کو فوری طور پر نزدیکی اسپتال پہنچایا گیا جہاں ان کا علاج و معالجہ کیا جا رہا ہے۔ عسکریت پسندوں کے خلاف جاری اس کارروائی کے دوران فوج ہیلی کاپٹر اور دیگر جنگی ساز و سامان کی بھی مدد لے رہی ہے۔
واضح رہے کہ گزشتہ روز صوبہ جموں کے راجوری میں بھی حفاظتی اہلکاروں اور عسکریت پسندوں کے مابین انکاؤنٹر ہوا جس میں دو عسکریت پسندوں کو ہلاک کیا گیا جبکہ گولیوں کے تبادلہ کے دوران ایک فوجی اہلکار بھی ہلاک ہو گیا جبکہ اس تصادم آرائی میں کے نائین (K9) یونٹ سے وابستہ ایک فوجی کتا بھی ہلاک ہو گیا۔
