سونمرگ /12 ؍دسمبر:
سیکرٹری سیاحت سیّد عابد رشید شاہ نے آج افسران اورشراکت داروں کی میٹنگ طلب کی تاکہ موسم سرما کی تیاریوں اور سونمرگ کوموسم سرما کے دوران کھلا رکھنے کے لئے متعلقہ سہولیات کا جائزہ لیا جا سکے۔میٹنگ میں ضلع ترقیاتی کمشنر شیامبیر ، ناظم سیاحت کشمیر راجا یعقوب ، اے ایس پی گاندربل، ایس ای مکینک ، سی ای او، ایس ڈی اے، ایس ڈی ایم کنگن، مختلف وِنگوںکے ایگزیکٹیو انجینئروں، ہوٹلیئر ایسوسی ایشن سونمرگ کے نمائندے، صدر بیوپر منڈل سونمرگ، ضلع انتظامیہ کے مختلف افسران ، ملازمین اور دیگر شراکت داروں نے شرکت کی۔
سیکرٹری سیاحت نے موسم سرما کے دوران سونمرگ کو کھلا رکھنے کے لئے پانی، بجلی، صحت، سڑک، برف صاف کرنے کے آپریشن، ٹریفک مینجمنٹ، زیڈ موڑ ٹنل کی آپریشنلائزیشن، لکڑی اور دیگر متعلقہ سہولیات سمیت ضروری تیاریوں اور انتظامات کا تفصیلی جائزہ لیا۔
ضلع ترقیاتی کمشنر گاندربل نے سیکرٹری موصوف کو موسم سرما کے دوران سونمرگ کو کھلا رکھنے کے ایکشن پلان اور یہاں آنے والے سیاحوں کو خاطر خواہ سہولیات فراہم کرنے کے لئے کئے گئے انتظامات کے بارے میںجانکاری دی۔اُنہوں نے انہیں برف صاف کرنے کے پلان کے بارے میں بریفنگ دی اور بتایا کہ برف ہٹانے کے لئے افرادی قوت کے ساتھ وافر مشینری بھی موجود ہے۔ اس کے علاوہ ہنگامی صورتحال میں زیڈ موڑ ٹنل کو اِستعمال کیا جائے گا۔
میٹنگ کو جانکاری دی گئی کہ پانی کی سپلائی میں اضافہ کیا گیا ہے اور پانی کی پائپ لائنوں کو سخت سردی میں جمنے سے بچانے کے لئے ان کی انسولیشن بھی کی گئی ہے۔اسی طرح ضلع ترقیاتی کمشنر نے بتایا کہ بجلی کی سپلائی کو بھی اَپ گریڈ کیا گیا ہے اور اس موسم سرما میں سونمرگ کے تمام اداروں کو زیر زمین کیبلنگ کے ذریعے بجلی کی فراہمی کی جائے گی۔
اُنہوںنے سیکرٹری کو بتایا کہ سی ای او ایس ڈی اے کے دفتر میں ایک کنٹرول روم قائم کیا گیا ہے جہاں 15 ؍دسمبر سے تمام محکموں کے نمائندگان تعینات کئے جائیں گے۔سیکرٹری سیاحت نے افسران اور دیگرشراکت داروںسے گفتگو کرتے ہوئے کہا کہ موسم سرما کے دوران سیاحوں کو بغیر کسی رُکاوٹ سہولیات کی فراہمی کیلئے تمام شراکت داروں کی مشترکہ کوششیں اور کوآرڈی نیشن ضروری ہے۔ اُنہوں نے کہا کہ موسم سرما کے دوران اِنجینئرنگ وِنگ کا کردار انتہائی اہمیت کا حامل ہوتا ہے اور انہوں نے اس بات پر زور دیا کہ موسم سرما کے دوران سیاحوں کو مناسب سہولیات کی دستیابی کو یقینی بنانے کے لئے تمام شراکت داروں کو اپنی کوششوں کو دوگنا کرنے کی ضرورت ہے اور کہا کہ اِنتظامیہ نے سونمرگ کو ہر موسم میں سیاحتی مقام کے طور پر مناسب فروغ دینے کے لئے تمام کوششیں کی ہیں۔
ڈاکٹرسیّد عابدرشید شاہ نے ضلع ترقیاتی کمشنر اور سی ای او ایس ڈی اے سے کہا کہ وہ سردیوں کے حوالے سے ’’کیا کریں اور نہ کریں‘‘ دستاویز تمام شراکت داروں بالخصوص ہوٹل مالکان کے ساتھ شیئر کریں اور انہیں موسم سرما کے دوران ضروری احتیاطی تدابیر کے بارے میں آگاہ کریں۔ضلع ترقیاتی کمشنر نے انہیں بتایا کہ محکمہ صحت کی جانب سے تمام ہوٹل مالکان کو ’بنیادی زندگی میں معاونت کی تربیت‘ دی گئی ہے اور یقین دلایا کہ موسم سرما کی احتیاطی تدابیر کے حوالے سے حساسیت کا پروگرام بھی منعقد کیا جائے گا۔
میٹنگ میں موسم سرما کے دوران منعقد کی جانے والی سرمائی سرگرمیوں پر بھی تبادلہ خیال کیا گیا اور بتایا گیا کہ جواہر اِنسٹی چیوٹ آف ماؤنٹینیئرنگ نے 10 ؍جنوری 2024 ء سیکنگ کے 6 کورسوںکا شیڈول جاری کیا ہے جبکہ موسم سرما کی دیگر سرگرمیوں کے انعقاد کے طریقوں پر بھی تبادلہ خیال کیا گیا۔
سیکرٹری کو بتایا گیا کہ ضلعی انتظامیہ دیگر شراکت داروں کے ساتھ مل کر 31 ؍دسمبر کو میگا نیو ایئر فیسٹول کا انعقاد کر رہی ہے جس کے لئے ایکشن پلان تیار کیاگیا ہے۔
