سری نگر،26دسمبر:
بھارتیہ جنتاپارٹی کے جنرل سیکریٹری (آرگنائزیشن) اشوک کول نے منگل کے روز کہاکہ فاروق عبداللہ کو آرام کی سخت ضرورت ہے۔
انہوں نے کہاکہ سال 1990میں حالات کو خراب کرنے کے بعد فاروق عبداللہ انگلینڈ چلے گئے ۔ان کے مطابق نہرو کی غلطی کی وجہ سے ہی پاکستانی زیر قبضہ کشمیر وجود میں آیا۔
ان باتوں کا اظہار موصوف نے کپواڑہ میں نامہ نگاروں سے بات چیت کے دوران کیا۔انہوں نے کہاکہ نیشنل کانفرنس کے سرپرست اعلیٰ ڈاکٹر فارو ق عبداللہ غلط بیانی سے کام لے رہے ہیں۔
ان کے مطابق این سی سرپرست کو آرام کی سخت ضرورت ہے ۔
انہوں نے مزید بتایا کہ جموں وکشمیر میں ملی ٹینسی کا جلد پوری طرح سے خاتمہ ہوگا۔اشوک کول نے کہا کہ پاکستانی زیر قبضہ کشمیر کو واپس لاکرہی بی جے پی دم لے گی ۔ٹارگیٹ کلنگ کے بارے میں پوچھے گئے سوال کے جواب میں اشوک کول نے کہاکہ ملوثین کو کسی بھی صورت میں بخشا نہیں جائے گا۔
انہوں نے کہاکہ پونچھ میں فوجی گاڑیوں پر حملے اور بارہ مولہ میں سابق ایس ایس پی کا قتل ناقابل برداشت ہے اور جوبھی ان واقعات میں ملوث ہوگا انہیں جلد ہی کیفرکردار تک پہنچایا جائے گا۔
پاکستانی زیر قبضہ کشمیر کے بارے میں پوچھے گئے سوال کے جواب میں اشوک کول نے کہاکہ موجودہ مرکزی حکومت جس کی سربراہی مودی جی کر رہے ہیں پاکستانی زیر قبضہ کشمیر کو واپس لا کے ہی دم لیں گے۔
انہوں نے کہاکہ نہرو کی غلطی کی وجہ سے ہی پاکستانی زیر قبضہ کشمیر وجود میں آیا ہے اور موجودہ حکومت اس کو واپس لا کر ہی دم لے گی۔
ان کے مطابق جموں وکشمیر میں دفعہ 370کی منسوخی کے بعد حالات دوبارہ معمول پر آئے ہیں۔
