سری نگر،27دسمبر:
شمالی ضلع بارہ مولہ میں پولیس نے ملی ٹینٹ معاون کو قابل اعتراض مواد سمیت گرفتار کرنے کا دعویٰ کیا ہے۔پولیس کے ایک ترجمان نے بتایا کہ بارہ مولہ کے کریری علاقے میں دہشت گردوں کی نقل وحمل کی اطلاع موصول ہونے کے بعد 52آر آراور پولیس نے شرکوارا کریری میں بس اسٹینڈ کے نزدیک ناکہ لگایا۔
انہوں نے کہاکہ مشتبہ نوجوان نے جوں ہی ناکہ پارٹی کو دیکھا تو اس نے راہ فرار اختیار کرنے کی کوشش کی تاہم سلامتی عملے نے پیشہ وارانہ صلاحیتوں کو بروئے کار لا کر نوجوان کی گرفتار ی عمل میں لائی۔
موصوف ترجمان کے مطابق ابتدائی پوچھ گچھ کے دوران نوجوان کی شناخت عمران احمد گنائی ولد عبدالقیوم گنائی ساکن نوپورہ واگورہ کریری کے بطور ہوئی ہے۔انہوں نے کہاکہ گرفتار ملی ٹینٹ معاون کے قبضے سے ایک چینی پستول ، ایک میگزین، نو پستول گولیوں کے راونڈ اور ایک موبائیل فون برآمد کرکے ضبط کیا گیا۔پولیس نے یو اے پی اے کی مختلف دفعات اور آرمز ایکٹ کے تحت کیس درج کرکے تحقیقات شروع کی ہے۔
