نئی دہلی / 04؍جنوری:جموں و کشمیر یوٹی نے پرگتی میدان کے بھارت منڈپم میں منعقدہ نیشنل ون ڈسٹرکٹ ون پروڈکٹ (او ڈی او پی) ایوارڈ تقریب کے دوران او ڈی او پی پہل کو فروغ دینے کے لئے سونے کا تمغہ جیتا ہے۔اتما بھر بھارت اُتسو 2024 ء کے دوران منعقد ہ اس تقریب میں ون ڈسٹرکٹ ون پروڈکٹ (او ڈی او پی)پہل میں غیر معمولی شراکت داروں کو تسلیم کیا جس میں ہندوستان کے ثقافتی ورثے، بھرپور تنوع، فنکارانہ مہارت اور کاروباری جذبے کی نمائش کی گئی۔
منیجنگ ڈائریکٹر جموں و کشمیر ٹریڈ پروموشن آرگنائزیشن (جے کے ٹی پی او) خالد جہانگیر نے جموںوکشمیر یوٹی کی جانب سے یہ ایوارڈحاصل کیا۔ جموں و کشمیر ٹریڈ پروموشن آرگنائزیشن (جے کے ٹی پی او) کو جموں و کشمیر یوٹی میں او ڈی او پی کے لئے نوڈل ایجنسی کے طور پر نامزد کیا گیا ہے جس نے خطے سے او ڈی او پی مصنوعات کو فروغ دینے میں اہم کردار اَدا کیا ہے۔
مزید برآں، جموں و کشمیر کے شوپیاں ضلع نے زرعی شعبے کے لئے ڈسٹرکٹ ایوارڈ کے زُمرے کے تحت کانسے کا ایوارڈ حاصل کیا۔ یہ اعزاز وَن ڈسٹرکٹ ون پروڈکٹ (او ڈی او پی) اَقدام میں ضلع کی قابل ستائش شراکت کو اُجاگر کرتا ہے بالخصوص باغبانی شعبے میں جس میں ایپل او ڈی او پی کی مصنوعات کے طور پر شامل ہے۔
وَن ڈسٹرکٹ وَن پروڈکٹ ( او ڈی او پی) ایوارڈز کی تقریب خود انحصاری کی طرف ہندوستان کے سفر کا ثبوت ہے اور جموں و کشمیر کے فاتحین نے او ڈی او پی پہل کو فروغ دینے میں شاندار کارکردگی کا مظاہرہ کیا ہے۔ لیفٹیننٹ گورنر منوج سِنہا کی قیادت میں جموںوکشمیر یوٹی اِختراع کو فروغ دینے اور ملک کی اِقتصادی اور ثقافتی ترقی میں حصہ اَدا کرنے کے عزم کو پورا کرنے کے لئے پیش پیش ہے۔
چیف سیکرٹری جموں و کشمیر اور کمشنر سیکرٹری صنعت و حرفت کے ساتھ خطے میں وَن ڈسٹرکٹ وَن پروڈکٹ( او ڈی او پی ) اَقدامات کو آگے بڑھانے میں ایک رہنما قوت رہے ہیں۔
مرکزی وزیر صنعت و حرفت ، امورِ صارفین، خوراک اور عوامی تقسیم اور ٹیکسٹائل پیوش گوئیل نے بیرون ملک ، ریاستوں اور ضلع ایوارڈ یافتہ ہندوستانی مشنوں کو مُبارک باد پیش کی ۔ اُنہوں نے ان پر زور دیا کہ وہ او ڈی او پی مصنوعات کو فروغ دینے کے لئے دوسروں کی حوصلہ افزائی جاری رکھیں جس سے مقامی بنکروں، کاریگروں اور کسانوں کو فائدہ پہنچے۔
پیوش گوئیل نے جی 20 سمٹ کے دوران او ڈی او پی کو فروغ دینے کے لئے بیرون ملک ہندوستانی مشنوں کی کوششوں پر روشنی ڈالی اور آنے والے برسوںمیں اتما نربھر بھارت اُتسو کی مسلسل ترقی کی توقع ظاہر کی۔
مرکزی وزیر خارجہ ڈاکٹر ایس جے شنکرجو اِس موقعہ پر مہمان خصوصی بھی ہیں، نے عالمی سطح پر ہندوستان کے تنوع کی نمائندگی کرنے میں او ڈی او پی کے اہم کردار پر زور دیا۔ اُنہوں نے ہندوستان کی جی20 صدارت کے دوران عالمی رہنمائوں کے سامنے مقامی او ڈی او پی مصنوعات کو پیش کرنے کی مثالوں کا اِشتراک کیااور خارجہ پالیسی ، خارجہ اِقتصادی پالیسی اور غیر ملکی تجارت کی پالیسی پر اِس اقدام کے اَثرات کو اُجاگر کیا۔
ڈاکٹر جے شنکر نے یقین ظاہر کیا کہ او ڈی او پی آنے والے برسوںمیں مضبوط سیاحت میں حصہ اَدا کرے گاکیوں کہ زیادہ سے زیادہ لوگ ہندوستان کے مختلف خطوں سے وابستہ فن، ثقافت اور تاریخ سے واقف ہوں گے۔
جے کے ٹی پی او نے وَن ڈسٹرکٹ وَن پروڈکٹ( او ڈی او پی ‘کے فروغ میں اہم کردار ادا کیا ہے اور ان اقدامات کو مزید فروغ دینے کے اپنے عزم پر قائم ہے۔ جموں و کشمیر میں او ڈی او پی مصنوعات کے فروغ کے لئے وقف ایک جامع سرگرمی منصوبہ تیار کیا گیا ہے تاکہ ہر ضلع کی مصنوعات پر توجہ مرکوز کرتے ہوئے او ڈی او پی کو مزید فروغ دیا جاسکے۔ حکومت کے تعاون سے جے کے ٹی پی او خطے میں او ڈی او پی مصنوعات کی ترقی اور شناخت کو فروغ دینے کے لئے مزید فعال اَقدامات کرے گا۔
