ڈی جی پی نے کہا کہ کپواڑہ میں عوامی شکایات کے ازالے کے پروگرام کا انعقاد ضلعی سطح پر شکایت کے ازالے کے پروگرام منعقد کرنے کے لیے اسٹیشن ہیڈ کوارٹر سے باہر جانے کی ایک عملی کوشش ہے جس کا مقصد دور دراز کے علاقوں میں بھی پولیس خدمات کو بہتر بنانا ہے۔ انہوں نے کہا کہ اس پروگرام کے سٹریٹجک مقاصد عوام کے مسائل اور شکایات کو دور کرنے کے علاوہ فورس پر عوام کے اعتماد کو مزید بڑھانا ہے۔ انہوں نے مزید کہا کہ ایسے پروگراموں کے انعقاد سے یہ بات یقینی بن جائے گی کہ شہریوں کو ان کی مقامی پولیس کی جانب سے بروقت اور مناسب تعاون حاصل ہو۔ انہوں نے کہا کہ عوامی شکایات کے ازالے کے پروگرام کے دوران پولیس سروس یا تفتیش سے متعلق شکایات کا فوری ازالہ کیا جاتا ہے۔ اس کے علاوہ، یہ اقدام ہمیں اپنے پولیس پریوار کے ممبران تک پہنچنے کے لئے بہترین موقع فراہم کرتا ہے جس میں ہمارے پولیس شہداء اور جاں بحق ہونے والے اہلکاروں کے اہل خانہ شامل ہیں اور ہم ان کو درپیش حقیقی مسائل کو حل کرنے کی کوشش کرتے ہیں۔
ڈی جی پی نے لوگوں کے کردار کی بھی تعریف کی اور فورس کے لیے ان کی غیر متزلزل حمایت پر ان کاشکریہ ادا کیا۔
واضح رہے کہ پولیس سربراہ سخت سردی کے باوجود اتوار کو شمالی کشمیر کے سرحدی ضلع کپواڑہ پہنچے اور سوموار کوعوامی شکایات کے ازالہ پروگرام منعقد کیا اورپہلے پروگراموں کی طرح اس پروگرام میں بھی کثیر تعداد میں شکایت کنندہ شہریوں نے شرکت کی۔
دن بھر جاری رہے اس پروگرام کے دوران تقریباً 613 افراد نے شرکت کی اور اپنی شکایات پولیس سربراہ کوپیش کیں۔ ڈی جی پی نے ان کی بات تحمل سے سنی اور انہیں شکایات کی معیاری اور فوری ازالے کی یقین دہانی کرائی۔ پروگرام کے دوران، ڈی جی پی نے کچھ شکایات کو موقع پر ہی فیلڈ فارمیشنز کو بھجوایی اور ان شکایات کی ترجیحی طور پر ازالے کو یقینی بنانے کی ہدایت کی۔
اس دوران انہوں نے کہا کہ ایس پی اوز جموں و کشمیر پولیس فورس کا ایک اہم اور لازمی حصہ ہیں جوفورس کے باقاعدہ ارکان کے ساتھ کندھے سے کندھا ملا کر کام کر رہے ہیں۔ انہوں نے کہا کہ پولیس ہیڈ کوارٹر نے ان اہلکاروں کی اہمیت کو تسلیم کیا ہے اور انہیں مختلف فلاحی اقدامات فراہم کرنے کے لیے اقدامات کیے ہیں جس میں فلاحی قرضے، طبی علاج کے لیے مالی امداد، اور ان کے بچوں کی تعلیمی اخراجات کے لئے رقوم پولیس کنٹریبیوٹری فنڈ سے واگزار کی جاتی ہے۔
پولیس ہیڈ کوارٹر جموں و کشمیر پولیس کے اہلکاروں کو درپیش مسائل بشمول ان کے خدشات اور شکایات کو حل کرنے کے ساتھ ساتھ انہیں اپنے فرائض کو مؤثر طریقے سے انجام دینے کے لیے ضروری مدد اور وسائل فراہم کر رہا ہے۔ تاہم، کچھ ایسے شعبے بھی ہیں جن پر زیادہ توجہ دینے کی ضرورت ہوتی ہے۔ ڈی جی پی نے منشیات فروشوں کے خلاف سخت کارروائی کا اشارہ کرتے ہوئے کہا کہ اس سے نوجوان نسل بری طرح متاثر ہوتی ہے۔
انہوں نے یقین دلایا کہ جموں و کشمیر پولیس پوری طاقت اور جزبےکے ساتھ کاروباری برادری کے ساتھ کھڑی ہے اور اسے روزگار کے مزید مواقع پیدا کرکے ملک کی معاشی ترقی میں اپنا حصہ ڈالنا جاری رکھنا چاہئے۔ انہوں نے خبردار کیا کہ کسی بھی سپانسر شدہ عنصر کو جموں و کشمیر میں امن و امان کی صورتحال کو خراب کرنے کی اجازت نہیں دی جائے گی۔
سرحدی ضلع کپوارہ میں منعقد شکایات کے ازالے کے پروگرام میں ایڈشنل ڈائریکٹر جنرل آف پولیس برائے لاء اینڈ آرڈر جناب وجے کمار، ایس ایس پی کپوارہ اور کمانڈنٹ آئی آر پی چوتھی بٹالین کے علاوہ مختلف ونگز کے دیگر گزیٹیڈ افسران نے شرکت کی۔
شکایات کے ازالے کے پروگرام سے پہلے ڈی جی پی جموں و کشمیر اور اے ڈی جی پی لاء اینڈ آرڈر نے شہداء کو خراج عقیدت پیش کرنے کے لیے یادگار شہداء پر پھولوں کی چادریں چڑھائی۔
