جموں/ 19؍جنوری:
ضلع ترقیاتی کمشنر سری نگر ڈاکٹر بلال محی الدین بٹ کی صدارت میں آج ڈی سی آفس کمپلیکس کے میٹنگ ہال میں تمام ضلعی و سیکٹورل اَفسران کی ایک میٹنگ ضلعی اِنتظامیہ اور مشینری کو موسم سرما کے چیلنجوں بالخصوص موجودہ موسمی ایڈوائزری کے حوالے سے متحرک کرنے کے لئے منعقد ہوئی۔
ضلع ترقیاتی کمشنر نے ضلع میں موسم سرما کی مجموعی تیاریوں کا تفصیلی جائزہ لیا جس میں صحت سہولیات، بجلی اور پانی کی فراہمی کی صورتحال، راشن، ایندھن،رسوئی گیس اور دیگر اشیائے ضروریہ کی دستیابی کے علاوہ ضلع بھر میں گاڑیوں ، ایمبولینسوں وغیرہ کی ہموار ٹرانسپورٹیشن کو یقینی بنانے کے لئے بروقت سنوکلیئرنس کے اِنتظامات کا تفصیلی جائزہ لیا۔
میٹنگ کے آغاز میں ضلع ترقیاتی کمشنر نے احتیاطی تدابیراِختیار کرنے پر زور دیا تاکہ تمام ضروری تنصیبات کے علاوہ تجارٹ ، ٹرانسپورٹ ، اشیائے ضروریہ اور دیگر معمول کے کام متاثر نہ ہوں۔
اُنہوں نے افسروں پر زور دیا کہ وہ موسم کی خرابیوں اور اس کے نتیجے میں سرمائی موسم میں برفباری کی وجہ سے پانی، بجلی اور سڑکوں کی بندش کی فراہمی میںحائل رُکاوٹوں کے بروقت ازالہ کو یقینی بنانے کے لئے اَفرادی قوت اور مشینری کو تیار رکھیں۔
دورانِ میٹنگ ضلع ترقیاتی کمشنر موصوف نے ضلع میں ایک خصوصی جوائنٹ کنٹرول روم قائم کرنے کی بھی ہدایت کی تاکہ عوام کی موسم سرما سے متعلق شکایات کا فوری ازالہ کیا جا سکے۔ اُنہوں نے متعلقہ اَفسران پر زور دیا کہ وہ لوگوں کو ضروری خدمات کی بغیر کسی پریشانی فراہمی کو یقینی بنانے کے لئے فوری رسپانس سسٹم کو یقینی بنائیں اور ہدایت دی کہ کسی بھی ہنگامی صورتحال کا سامنا کرتے ہوئے رسپانس ٹائم کو کم سے کم کیا جائے۔ضلع ترقیاتی کمشنر نے سنو کلیئرنس کے سلسلے میں کی جانے والی تیاریوں کا بھی جائزہ لیا۔
ضلع ترقیاتی کمشنر کو جانکاری دی گئی کہ سری نگر میں آر اینڈ بی، ایس ایم سی اورمیکنیکل اِنجینئرنگ ڈیپارٹمنٹ کی طرف سے مناسب تعداد میں ہائی ٹیک سنو کلیئرنس مشینیں تیار رکھی گئی ہیں جن میں سے مختلف مشینیں ضلع بھر میں اہم تنصیبات اور اہم مقامات پر تعینات کی گئی ہیں جبکہ شدید برفباری کے دوران کسی بھی ہنگامی صورتحال سے نمٹنے کے لئے کچھ مشینوں کو سٹینڈ بائی موڈ میں رکھا گیا ہے۔
اِس کے علاوہ بارش یا برفباری کی وجہ سے پانی جمع ہونے سے نمٹنے کے لئے ضلع میں ایس ایم سی کے ذریعے مستقل اور موبائل ڈی واٹرنگ سٹیشن چلائے جاتے ہیں۔مزید برآن،یو اِی اِی ڈی کے ڈی واٹر نگ پمپ بھی پانی بھرنے سے نمٹنے کے لئے کام کر رہے ہیں۔
ضلع ترقیاتی کمشنر نے ایس ایم سی حکام سے کہا کہ وہ اَفرادی قوت اور مشینری کو شہر کی اندرونی گلیوں اور بائی لین سے برف صاف کرنے کے لئے تیار رکھیں۔
اسی طرح ضلع ترقیاتی کمشنر نے چیف میڈیکل آفیسر کو ہدایت دی کہ سرمائی موسم میں تمام ہسپتالوں میںسینٹرل ہیٹنگ سسٹم کو مناسب طریقے سے چلانے کے علاوہ شہر کے تمام ہسپتالوں میں عملے، ادویات ، ایمرجنسی میڈیسن، ایمبولینس سروسز کے وافر سٹاک کی دستیابی کو یقینی بنایا جائے۔
اُنہوں نے ضلع میں بجلی کی فراہمی کے منظر نامے کا جائزہ لیتے ہوئے کے پی ڈی سی ایل کے اِنجینئروں سے کہا کہ وہ تمام مطلوبہ اَقدامات کریں تاکہ اس بات کو یقینی بنایا جا سکے کہ برفباری کے دوران بالخصوص ضلع میں ضروری تنصیبات پر بجلی کی فراہمی متاثر نہ ہو۔ اُنہوں نے اَفسران سے کہا کہ برفباری کی وجہ سے خراب ہونے کی صورت میں برقی سپلائی کی جلد بحالی کے لئے اَفرادی قوت اور مشینری کو تیار رکھیں۔
ضلع ترقیاتی کمشنر نے ضلع کے تمام علاقوں میں خراب ٹرانسفارمروں کی ٹائم بانڈ تبدیلی پر زور دیا تاکہ لوگوں کو کسی قسم کی پریشانی کا سامنا نہ کرنا پڑے۔
اسسٹنٹ ڈائریکٹر ایف سی ایس اینڈ سی اے نے بتایا کہ مطالبات کو پورا کرنے کے لئے راشن کا کافی ذخیرہ دستیاب ہے جبکہ ضلع میں کم از کم 20 دنوں کے لئے ایل پی جی سٹاک کے علاوہ پیٹرول اور ڈیزل کی سپلائی بھی بفر سٹاک میں ہے۔
میٹنگ میں ایڈیشنل ڈسٹرکٹ ڈیولپمنٹ کمشنر ظہور احمد میر ، آر اینڈ بی، ایم ای ڈی، پی ڈی ڈی، ایس ایم سی کے سپرانٹنڈنٹ انجینئروں، چیف پلاننگ اَفسران، چیف میڈیکل آفیسر، اسسٹنٹ کمشنر ریونیو، ایس ڈی ایم ایسٹ، ایس ڈی ایم ویسٹ، تمام تحصیلدار اور اے ڈی ، ایف ایس اینڈ سی اے ، ٹریفک پولیس اور سول ایڈمنسٹریشن کے دیگر سینئر افسران نے شرکت کی۔
