سرینگر: جموں وکشمیر کا موسم اپنا رنگ دکھا رہا ہے۔ نمی کا قہر نہ صرف جموں بلکہ سری نگر میں بھی نظر آرہا ہے اور گزشتہ روز ہونے والی بارش کی وجہ سے جموں کے درجۂ حرارت میں کچھ کمی آئی اور بدھ کو جموں اور سری نگر کا زیادہ سے زیادہ درجۂ حرارت ایک جیسا رہا۔ جموں کا زیادہ سے زیادہ درجۂ حرارت 35.6 ڈگری سیلسیس رہا اور سری نگر کا زیادہ سے زیادہ درجۂ حرارت بھی یہی رہا۔ بدھ کا دن سری نگر کے گرم ترین دنوں میں سے ایک تھا۔ اس سے قبل 18 جولائی 2021 کو سری نگر کا زیادہ سے زیادہ درجۂ حرارت 35.0 ڈگری سیلسیس ریکارڈ کیا گیا تھا۔ یکم جولائی 2016 کو درجۂ حرارت 34.6 ڈگری سیلسیس تھا۔ 6 جولائی 2015 کو زیادہ سے زیادہ درجۂ حرارت 33.6 ڈگری سیلسیس ریکارڈ کیا گیا۔
سرینگر کے موسمیاتی مرکز کے مطابق 24 جولائی 2024 سری نگر کا گرم ترین دن تھا اور اس دوران درجۂ حرارت 38.3 ڈگری سیلسیس تک پہنچ گیا۔ جموں و کشمیر میں جموں ڈویژن کا سانبہ ضلع سب سے زیادہ گرم رہا۔ یہاں زیادہ سے زیادہ درجۂ حرارت 38.7 ڈگری سیلسیس رہا۔ کٹھوعہ کا زیادہ سے زیادہ درجۂ حرارت 37.8 ڈگری سیلسیس ریکارڈ کیا گیا۔ ریاسی کا زیادہ سے زیادہ درجۂ حرارت 35.3 ڈگری سیلسیس ریکارڈ کیا گیا۔
جموں ڈویژن میں ان دنوں مرطوب اور شدید گرم ہونا فطری ہے، لیکن کشمیر میں بھی مسلسل گرمی پڑ رہی ہے۔ پہلگام کو چھوڑ کر بیشتر اضلاع میں درجۂ حرارت 30 ڈگری سیلسیس سے اوپر ہے۔ پہلگام کا زیادہ سے زیادہ درجۂ حرارت 29.3 ڈگری سیلسیس ریکارڈ کیا گیا۔ جموں و کشمیر کا زیادہ سے زیادہ درجۂ حرارت تقریباً ایک جیسا ہے لیکن جموں میں نمی بہت زیادہ ہے۔ شدید گرمی کے درمیان ہر وقت پسینہ آتا ہے۔ شدید گرمی میں گھر سے نکلنا مشکل ہوگیا ہے۔ چلچلاتی گرمی آپ کو دن میں پریشان کرتی ہے اور نمی آپ کو رات کو نیند سے محروم کر دیتی ہے۔ محکمۂ موسمیات نے آنے والے ایام میں بارش کی پیشگوئی کی ہے۔
