جموں: جموں کشمیر میں پیر کی دوپہر حالیہ اسمبلی انتخابات میں منتخب ایم ایل اے حلف لے رہے ہیں، جن میں بی جے پی کے 29 اراکین اسمبلی بھی شامل ہیں۔ اسمبلی میں حلف لینے سے قبل بی جے پی نے منتخب ہوئے اپنے اراکین کے اعزاز میں ایک تقریب منعقد کی تھی جس میں جموں سے چنے گئے سبھی نو منتخب اراکین نے شرکت کی۔ اس موقع پر انہوں نے خوشی کا اظہار کرتے ہوئے کہا کہ ’’یہ ہم سب کے لیے ایک خوشی کا موقع ہے کہ پارٹی نے حلف لینے سے قبل ہمارے اعزاز میں یہ تقریب منعقد کی۔‘‘
بھارتیہ جنتا پارٹی کے ایم ایل اے سنیل شرما نے کہا کہ ’’لوگوں نے ہم سب پر ایک بڑی ذمہ داری ڈالی ہے۔ جس کو ہم پوری طرح سے نبھانے کی کوشش کریں گے۔‘‘ انہوں نے مزید کہا کہ بھلے ہی حکومت این سی کی ہے لیکن بی جے پی بہتر اپوزیشن کا رول ادا کرے گی۔ جہاں حکومت جموں وکشمیر کے لیے مثبت کام انجام دے گی تو ہم حکومت کی تعریف ضرور کریں گے اور جہاں موجودہ حکومت جموں وکشمیر کے لوگوں کی توقعات کے خلاف کام انجام دے گی ہم ضرور بااثر آواز بن کر انہیں تنقید کا نشانہ بنائیں گے۔
اس موقع پر رام گڑھ حلقے کی ایم ایل اے ڈاکٹر سنیل بردھواج نے ای ٹی وی بھارت کے ساتھ بات کرتے ہوئے کہا کہ کشتواڑ ضلع میں لوگوں کا تحفظ ہماری ترجیحات میں شامل ہے جبکہ علاقے میں تعمیر وترقی پر بھی ہمارا بھر پور توجہ مرکوز رہے گا۔
یاد رہے کہ بی جے پی نے اسمبلی الیکشن میں 29 سیٹوں پر قبضہ کیا اور این سی کے بعد دوسری بڑی سیاسی جماعت بن کر سامنے آئی ہے۔ اس طرح کشتواڑ سے بی جے پی ایم ایل اے 29 سالہ شگون پریہار سب سے کم عمر اسمبلی کی رکن ہے۔ جبکہ این سی کے چرار شریف حلقہ انتخاب کے ایم ایل اے 80 سالہ عبدالرحیم راتھر سب سے بزرگ رکن اسمبلی ہے۔
قانون ساز اسمبلی میں اس مرتبہ تین خواتین ایم ایل اےبھی ہیں جن میں کشتوار سے ایم ایل اے شگون پریہار، ڈی ایچ پورہ کی ایم ایل اے سکینہ مسعود ایتو اور حبہ کدل کی ایم ایل اے شمیم فردوس کے نام قابل ذکر ہیں۔ یاد رہے کہ ابھی پانچ ایم ایل ایز کو کابینہ میں جگہ ملی ہے جن میں سریندر کمار چودھری، ستیش شرما، سکینہ ایتو، جاوید رانا اور جاوید احمد ڈار، جنہوں نے عمر عبداللہ کے ہمراہ آئین ہند کے تئیں رازداری اور وفاداری کا حلف لیا۔
