نئی دہلی، 2 جون:
مشہور سنتورنواز بھجن سوپوری کا جمعرات کو ہریانہ کے گروگرام کے ایک نجی اسپتال میں انتقال ہوگیا۔بھجن سوپوری، جو ‘ سینٹ آف سنتور’ کے نام سے مشہور ہیں، جموں و کشمیر کے سری نگر ضلع میں 1948 میں پیدا ہوئے۔ ان کا پورا نام بھجن لال سوپوری تھا۔ ان کے والد ایس این سوپوری بھی سنتور بجانے کے ماہر تھے۔
سنتور بجانے کی ابتدائی تعلیم اپنے والد سے حاصل کی۔ ان کے والد نے انہیں گانا بھی سکھایا۔ بھجن لال سوپوری نے انگریزی میں پوسٹ گریجویشن کیا اور امریکہ میں مغربی کلاسیکی موسیقی کی تعلیم بھی حاصل کی۔
انہوں نے موسیقی اور پرفارمنگ آرٹس کے لیے سوپوری اکیڈمی کی بنیاد رکھی، جو جیل کی سزا بھگت رہے لوگوں کے علاج کے لیے اور معاشرے اور قیدیوں کے درمیان جذباتی تعلق کو برقرار رکھنے کے لیے میوزک تھراپی کا استعمال کرتی ہے۔
بھجن سوپوری کو 1993 میں سنگیت ناٹک اکادمی ایوارڈ، 2004 میں پدم شری اور 2016 میں جے اینڈ کے اسٹیٹ لائف ٹائم اچیومنٹ ایوارڈ سے نوازا گیا اور کئی دیگر اعزازات سے بھی نوازا گیا۔ انہوں نے سنسکرت، عربی، فارسی اور دیگر زبانوں میں 400 سے زیادہ گانے لکھے۔ اپنی ذاتی تفصیل کے مطابق انہوں نے اپنے تجربات سے راگ لالیشوری، راگ پتونتی اور راگ نرمل رنجانی تیار کی۔
