سری نگر، 13 مارچ: پی ڈی پی صدر اور سابق وزیر اعلیٰ محبوبہ مفتی نے لوگوں سے اپیل کی ہے کہ وہ ووٹ کے ذریعے بی جے پی کو کرارا جواب دیں انہوں الزام بی جے پیر الزام لگاتے ہوئے کہا: ‘بی جے پی نے ملک میں لوگوں کو مذہب کے نام پر تقسیم کرنے کے لئے ہر نسخہ آزمایا اور اب شہریت ترمیمی قانون لایا گیا تاکہ مسلمان سڑکوں پر آجائیں’ موصوف سابق وزیر اعلیٰ نے ان باتوں کا اظہار بدھ کے روز یہاں نامہ نگاروں کے سوالوں کے جواب دینے کے دوران کیا۔
انہوں نے کہا: ‘گذشتہ دس برسوں کے دوران بی جے پی حکومت ملک میں بے روز گاری، بے روزگاری کی وجہ سے نوجوانوں کی خود کشیاں، کسانوں کا حال، مہنگائی وغیرہ جیسی ناکامیوں سے لوگوں کی توجہ ہٹانے کے لئے بہت کوششیں کر رہی ہے’۔
ان کا کہنا تھا: ‘بی جے پی نے ملک میں فرقہ وارانہ فسادات کو ہوا دینے کے لئے تمام نسخے آزمائے تاکہ مسلمان سڑکوں پر آجائیں اور اب وہ شہریت ترمیمی قانون لے کر آئے ہیں’۔
محبوبہ مفتی نے ہندو اور مسلمانوں سے اپیل کی کہ وہ اس جال میں نہ پھنسیں۔انہوں نے کہا کہ ہمارے ملک کی سب سے زیادہ خوبصورت چیزیں ہماری جمہوریت اور ہمارا آئین ہے۔
