سری نگر: پیپلز ڈیموکریٹک پارٹی کی لیڈر التجا مفتی نے عمر عبداللہ حکومت سے مطالبہ کیا کہ، حکومت جموں و کشمیر میں سرکاری ملازمین کی برطرفی کے معاملے میں تیزی سے کام کرے۔ انہوں نے کہا کہ، یہ انتہائی افسوس ناک ہے کہ ملازمین کو گھٹیا الزامات لگا کر برطرف کیا جا رہا ہے۔ وہ سری نگر میں پی ڈی پی ہیڈ کوارٹر کے باہر صحافیوں سے بات کر رہی تھیں۔
التجا مفتی نے کہا کہ ملازمین کی برطرفی پر منتخب حکومت کی خاموشی انتہائی افسوس ناک ہے۔ انہوں نے کہا کہ "یہ ایک مقبول منتخب حکومت ہے اور اسے موضوع کو بہت سنجیدگی سے لینا چاہیے اور اس پر عمل کرنا چاہیے۔”
پی ڈی پی لیڈر التجا مفتی نے اس موقع پر مرکزی حکومت کو بھی گھیرا۔ انھوں نے کہا کہ مرکزی وزارت داخلہ کو جموں و کشمیر میں عسکریت پسندی کے واقعات اور جھڑپوں میں اضافے پر وضاحت پیش کرنی چاہیے۔
التجا مفتی نے کہا کہ، جموں و کشمیر میں عسکریت پسندوں کے حملوں میں بے تحاشا اضافہ ہوا ہے۔ انھوں نے وزارت داخلہ سے سوال کیا کہ، جموں و کشمیر کے قانون و انتظام پر کنٹرول ہونے کے باوجود آخر عسکریت پسندوں کے حملوں میں اتنی تیزی کیوں آئی ہے۔
التجا مفتی نے نئے ہائی وے اور ریلوے منصوبوں پر تشویش کا اظہار کیا ہے۔ ان کا کہنا ہے کہ ان منصوبوں کے لیے زرعی زمین استعمال کی جا رہی ہے، جس سے بے روزگاری میں اضافہ ہو سکتا ہے۔ انھوں نے کہا کہ یہ ترقیاتی منصوبے کسانوں اور زراعت پر مبنی معیشت کے لیے سنگین مسائل پیدا کر سکتے ہیں۔
