سرینگر :وزیر دفاع مسٹر راج ناتھ سنگھ نے آج 2236 کروڑ روپے کی لاگت سے بارڈر روڈ آرگنائیزیشن ( بی آر او ) کے 75 بنیادی ڈھانچے کے پروجیکٹوں کو قوم کے نام وقف کیا ۔ ان میں سے 19 جموں و کشمیر میں ہیں ۔ اپنے خطاب میں وزیر دفاع نے ان پروجیکٹوں کو سرحدی بنیادی ڈھانچے کو مضبوط بنانے اور ان علاقوں کی سماجی و اقتصادی ترقی کو یقینی بنانے کیلئے حکومت کے اٹل عزم کا ثبوت قرار دیا ۔
لفٹینٹ گورنر نے وزیر اعظم شری نریندر مودی اور وزیر دفاع مسٹر راج ناتھ سنگھ کا ان اہم پروجیکٹوں کیلئے تہہ دل سے شکریہ ادا کیا ۔
انہوں نے کہا کہ یہ انفراسٹرکچر فوج اور سول انتظامیہ دونوں کیلئے اہم ہیں اور دور دراز علاقوں کے لوگوں کیلئے معاشی لائف لائن ثابت ہوں گے ۔
لفٹینٹ گورنر نے کہا کہ گذشتہ چند برسوں میں جموں و کشمیر میں سڑک کے بنیادی ڈھانچے اور کنیکٹیویٹی ، خاص طور پر سٹریٹجک اہمیت کے حامل علاقوں میں تبدیلی آئی ہے ۔ انہوں نے کہا کہ یہ پورے جموں و کشمیر میں مساوی ترقی اور لاسٹ میل کنیکٹیویٹی کو یقینی بنانے کیلئے وزیر اعظم مسٹر نریندر مودی کے عزم کی عکاسی کرتا ہے ۔
لفٹینٹ گورنر نے کہا کہ آج جن سڑکوں اور پلوں کے پروجیکٹوں کا افتتاح کیا گیا ہے ان کا سرحدی سیاحت پر مثبت اثر پڑے گا ، روز گار کے نئے مواقع پیدا ہوںگے ، معاشرے میں معاشی خوشحالی آئے گی اور آگے کے علاقوں میں معیار زندگی بہتر ہو گا ۔
انہوں نے مزید کہا کہ یہ پروجیکٹ ہندوستانی فوج کی آپریشنل صلاحیت کو بہتر بنائیں گے اور فوجیوں کیلئے نقل و حرکت اور لاجسٹک سپورٹ کو فروغ دیں گے ۔
لفٹینٹ گورنر نے سرحدی علاقوں میں سماجی و اقتصادی تبدیلی اور قومی یکجہتی میں بارڈر روڈز آرگنائیزیشن کے اہم کردار کو بھی سراہا ۔
جموں و کشمیر میں جن سڑکوں اور پلوں کا افتتاح کیا گیا ان میں موہورا باز روڈ ، ٹوٹمریگلی کائیاں باول روڈ ، گورائی پُل بانڈی پورہ گریز روڈ ، گارجن پُل ٹوٹمریگلی بیس سے اوپر تک ، نیرو نار داور ۔ نیرو ۔ بیروب ۔ چکوالی ۔ کاؤبل گلی روڈ ، بشناہ کولپور ۔ کھوج پور روڈ ، بسوہلی ۔ بنی ۔ بھدرواہ روڈ ، گلہار سنساری روڈ ، سوان پُل ، بسوہلی ۔ بنی ۔ بھدرواہ روڈ ، سانو پُل دومیل ۔ جندرا۔ کھرتا روڈ، ، نیگڑھ پُل دول گلہار روڈ ، چننی پُل دومیل ۔ جندرا ۔ کھرتا روڈ ، ، نیٹو پُل گلہار سنساری روڈ ، کوگرا پُل دومیل جندرا کھرتا روڈ ، درسو پُل دھار اودھمپور روڈ اور سیوا II پُل بسوہلی ۔ بنی ۔ بھدرواہ روڈ شامل ہیں ۔
