سری نگر19دسمبر(یو این آئی)جنوبی کشمیر کے کاڈر کولگام میں سیکورٹی فورسز کے ساتھ تصادم میں حزب کمانڈر سمیت پانچ مقامی ملی ٹینٹ مارے گئے ہیں۔
بریگیڈیر انورد چوہان کے مطابق تصادم کے دوران حزب المجاہدین کا جموں وکشمیر یونٹ کا سربراہ بھی ہلاک ہوا ۔
انہوں نے کہاکہ حزب کمانڈر سیکورٹی ایجنسیوں کو انتہائی مطلوب تھا اور اس کی ہلاکت سے دہشت گرد تنظیم کو بہت بڑا دھچکا لگا ہے۔
اطلاعات کے مطابق ڈی آئی جی جنوبی کشمیر جاوید اقبال متو اور فوج کے بریگیڈیر انورد چوہان نے ایک مشترکہ پریس کانفرنس کے دوران کاڈر کولگام میں ہوئے خونین تصادم کے بارے میں جانکاری فراہم کی۔
ڈی آئی جی جاوید اقبال متو نے کہاکہ کل شام سیکورٹی فورسز کو مصدقہ اطلا ع موصول ہوئی کہ کولگام کے کاڈر علاقے میں ملی ٹینٹ چھپے بیٹھے ہیں۔
انہوں نے کہاکہ جوں ہی سلامتی عملے کے اہلکار مشتبہ مقام کے نزدیک پہنچے تو وہاں پر موجود ملی ٹینٹوں نے فائرنگ شروع کردی چنانچہ سلامتی عملے نے بھی جوابی کارروائی کا آغاز کیا جس دوران کافی دیر تک دو بدو گولیوں کا تبادلہ جاری رہا ہے۔
ڈی آئی جی کے مطابق کچھ دیر تک جاری رہنے والی اس جھڑپ میں پانچ مقامی ملی ٹینٹ مارے گئے جن کی شناخت فاروق احمد بٹ، مشتاق احمد یتو، عرفان یعقوب، عادل ہجام اور یاسر جاوید ساکنان کولگام کے بطور ہوئی ہے۔
انہوں نے کہاکہ فاروق احمد بٹ نے سال 2015میں حزب المجاہدین میں شمولیت اختیار کی جبکہ مشتاق احمد یتو نامی مہلوک ملی ٹینٹ سال 2020سے سرگرم تھا۔
انہوں نے کہاکہ مہلوک دہشت گردوں کے خلاف متعدد مقدمات پولیس تھانوں میں درج ہیں اور ان کی کافی عرصے سے تلاش تھی۔
انہوں نے مزید بتایا کہ حزب کمانڈر فاروق احمد بٹ کے خلاف 37مقدمات درج ہیں جس سے یہ اندازہ لگایا جاسکتا ہے کہ وہ کتنا خطرناک دہشت گر د تھا۔
ڈی آئی جی جنوبی کشمیر کا کہنا ہے کہ مہلوک کمانڈر فاروق احمد بٹ کے خلاف 376یعنی آبرو ریزی کے سلسلے میں بھی ایک مقدمہ درج ہے۔
ڈپٹی انسپکٹر جنرل آف پولیس کے مطابق گزشتہ کئی ہفتوں سے مہلوک ملی ٹینٹوں کی حرکات و سکنات پر نظر گزرے بنائے رکھے ہوئے تھے اور کل شام ہمیں انہیں مار گرانے میں کامیابی حاصل ہوئی۔
اس موقع پر فوج کے بریگیڈیر انورد چوہان نے کہاکہ ملی ٹینٹوں کو مار گرانے سے پہلے آس پاس رہائش پذیر لوگوں کو محفوظ مقامات کی اور منتقل کیا گیا۔
ان کے مطابق چھ گھنٹے تک جاری رہنے والی اس جھڑپ میں حزب کمانڈر اور اس کے چار ساتھی مارے گئے۔
انہوں نے کہاکہ فاروق احمد بٹ عرف فاروق نالی حزب المجاہدین کا جموں وکشمیر یونٹ کا سربراہ تھا اورا س کی سیکورٹی ایجنسیوں کو کافی عرصے سے تلاش تھی۔
انہوں نے مزید بتایا کہ فاروق احمد بٹ نامی حزب کمانڈرمقامی نوجوانوں کو دہشت گرد صفوں میں شامل کرانے میں پیش پیش تھا ۔
بریگیڈیر کے مطابق تصادم کی جگہ بڑی مقدار میں اسلحہ وگولہ بارود اورقابل اعتراض مواد برآمد کرکے ضبط کیا گیا۔
