سرینگر28جنوری:
پولیس نے شمالی کشمیر میں نوکری کا جھانسہ دے کر لوگوں کو لوٹنے والے ایک گروہ کا پردہ فاش کرنے کا دعویٰ کیا ہے۔ یو پی آئی کے مطابق جموں وکشمیر پولیس نے ہفتے کے روز کہاکہ شمالی کشمیر کے بارہ مولہ ضلع کے پٹن علاقے میں دو افراد کو گرفتار کیا گیا ہے جو خود کو سیاسی کارکن ظاہر کرتے ہوئے لوگوں کو سرکاری ملازمت فراہم کرنے کا دعویٰ کرکے اُن سے بھاری رقم وصول کر رہے تھے۔ پولیس کے ایک ترجمان نے بتایا کہ 11جنوری کو پولیس نے مصدقہ اطلاع ملنے کے بعد پٹن علاقے میں دو خود ساختہ سیاسی کارکن سرکاری ملازمت اور تقرری نامہ فراہم کرنے کا جھانسہ دے کر نوجوانوں سے بھاری رقومات وصول کر رہے ہیں۔
بیان میں کہا گیا ہے کہ اطلارع ملتے ہی پولیس حرکت میں آگئی اور فوری طور پر پولیس تھانہ پٹن میں قانون کی متعلقہ دفعات کے تحت مقدمہ درج کر لیا۔ پولیس ترجمان نے بتایا کہ تفتیش کے دوران پولیس نے تمام تکنیکی اور ہیومن انٹیلی جنس کو بروئے کار لاتے ہوئے بھر پور کوشش کے بعد عبید نذیر صوفی اور اقبال نامی دو ملزمان کو گرفتار کیا۔
پولیس نے کہاکہ پوچھ گچھ کے دوران معلو م ہوا کہ یہ جعلساز جموں وکشمیر پولیس میں نوکری دلانے کا جھانسہ دے کر عام لوگوں کو دھوکہ دے رہے تھے اور ان سے بھاری رقم لے رہے تھے۔ انہوں نے کہاکہ نوکری نہ ملنے پر رقومات واپس مانگنے پر وہ لوگوں کو دھمکیاں دیتے تھے۔ پولیس نے بتایا کہ معاملے کی باریک بینی سے تحقیقات شروع کی گئی ہے۔
