جموں/13؍فروری:
ڈی آئی پی آر کے کلچرل یونٹ کشمیر نے میڈیا کمپلیکس ڈی آئی پی آر سری نگر میں آج ریڈیو کے عالمی دن کے موقعہ پر ایک پینل ڈسکشن کااِنعقادکیا۔معروف براڈکاسٹر، شاعر ، مصنف اور پروگرام ایگزیکٹیو اے آئی آر سری نگر ستیش ومل، آر جے سمین خان آر جے رفیق (ریڈ ایف ایم) اور ممتاز ریڈیو وائس مبشر رفاعی پینلسٹ تھے جبکہ ڈی آئی پی آر کے جَن ذی رضاکاروں نے بحث میں حصہ لیا۔
کلچرل آفیسر کشمیر برہان حسین نے پینلسٹ کا خیرمقدم کرتے ہوئے ریڈیو جرنلزم سے منسلک ارتقاء ، اختراعات اور کیریئر کے مواقع کے بارے میں تفصیل سے بتایا۔ اُنہوں نے مزید کہا کہ یہ ایک انتہائی امید افزا ماس میڈیم ہے جو ہر گزرتے دن کے ساتھ تیزی سے مقبول ہوتا جا رہا ہے، اور طلباء اور نوجوانوں کو اس شاندار پیشے کا انتخاب کرنا چاہیے۔
سیشن کی نظامت کے فرائض اَنجام دیتے ہوئے اے ای سی او سیّدشکیل شان نے ریڈیو کے111 برس کے سفر میں اس کے کردار اور افادیت پر روشنی ڈالی۔ اُنہوں نے گزشتہ 11 برسوں سے عالمی یوم ریڈیو کے طور پر اسے عالمی سطح پر منانے میں یونیسکو کے کردار کو سراہا۔
پینل ڈسکشن کے دوران ستیش ومل نے کہا کہ بدلتی ہوئی اور ہائی ٹیک دنیا میں اپنے سفر کو آگے بڑھانے کے لئے ریڈیو سے محبت کرنے والوں اور معاشرے کے درمیان زیادہ سے زیادہ رابطے کی ضرورت ہے۔
آر جے سمین نے کمیونٹی ریڈیو کے ظہور اور مقامی مسائل کو حل کرنے اور ثقافت اور زبانوں کے تحفظ میں اس کے کردار پر بات کی۔
آر جے رفیق نے کہا کہ ریڈیو ایک صاف ستھرا اور کنٹرولڈ میڈیا ہے جو انتہائی مستعدی کے ساتھ سامعین تک پہنچتا ہے جہاں کوئی دوسرا میڈیا نہیں پہنچ سکتا۔
ڈی آئی پی آر کے طلباء رضاکاروں نے ریڈیو کے مختلف پہلوؤں اور آج کی دنیا میں اس کی اہمیت پر سوالات پوچھے۔
